DILI, 28 novembru 2024 (TATOLI)—Primeiru-Ministru (PM), Kay Rala Xanana Gusmão, akompaña husi entidade Governu, kinta ne’e, prezide serimónia isar bandeira nasionál iha Prizaun Becora, hamutuk ho dadur sira, iha ámbitu selebrasaun loron Proklamasaun Independénsia ba dala-49.
PM Xanana hateten, joven sira lalika rona liafuan oin-oin ne’ebé ema balun espalla liuhusi maneira oin-oin hodi kria instabilidade iha rai-laran tanba iha konvidadu barak mak mai partisipa serimónia Estadu iha Oé-cusse.
“Haree dook bá iha ne’ebá, reprezentante Governu Jakarta, Prezidente Repúblika Prabowo haruka nia Jenerál sira mai to’o iha ne’ebá no Malázia. Ne’e hatudu katak ema fó konfiansa ba ita-nia rai, rai ida-ne’ebé haluhan tiha buat hotu ne’ebé akontese iha tempu uluk nian hodi hahú agora kria armonia no kria amizade hodi hotu-hotu tuur hamutuk ko’alia ba malu hodi oinsá bele dezenvolve rai ida-ne’e no povu ida-ne’e nia moris,” Xefe Governu hato’o depoizde serimónia isar bandeira, iha resintu Prizaun Becora.
Notísia relevante : Sjafrie reprezenta Prabowo partisipa komemorasaun loron proklamasaun independénsia ba da-49
Nia sita Prezidente Repúblika, José Ramos Horta nia diskursu iha Oé-cusse, ne’ebé husu liu-liu joven sira atu haluha buat ne’ebé akontese iha pasadu.
“Ita hamutuk iha armonia nia laran, ita hateke ba oin, ba rai ida-ne’e no povu ida-ne’e,” PM fó sai.
Iha fatin hanesan, Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, konsidera rekonsiliasaun no dame hanesan parte ida ba ukun rasik-an.
“Ita presiza kuidadu ita-nia nasaun iha rejiaun ne’e hakmatek ho país rua, Austrália no Indonezia. Ita halo opsaun polítika importante atu asegura fronteira no asegura livremente ba jerasaun foun ba ne’ebé de’it ho hakmatek,” nia hato’o.
Tuir Ministru, liuhusi dalan ne’e mak bele fó valór no respeitu ba eroi no dignifika mártir sira.
Nune’e, governante ne’e husu ba ema hotu atu kontinua fó kontribuisaun ba dezenvolvimentu nasionál.
Jornalista : Jesuína Xavier
Editora : Julia Chatarina
