DILI, 02 dezembru 2024 (TATOLI)—Deputadu membru Komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), Natalino dos Santos, hateten komandu jerál Polísia Nasionál Timor-Leste (PNTL) atu kontrola sirkulasaun fogete tama mai iha rai-laran.
“Ita preokupa, ita atu besik tama ba selebra loron natál ho tinan foun, ita haree iha Dili laran komesa iha ona fogete tarutu. Tanbasá agora faan. Ita uza perturba situasaun la fó hakmatek ba ema,’’ Nia hateten ba jornalista sira iha resintu PN, segunda ne’e.
Nia alerta ba Polísia Nasionál Timor-Leste (PNTL) atu tau regra kontrola ba ema sira-ne’ebé faan fogete.
Tanba fogete ne’e só lian iha loron ne’ebé importante hanesan 31 dezembru kalan ne’e hanoin bele, maibé sunu la kontroladu dahuluk la fó hakmatek ba ema seluk ne’ebé hakarak deskansa halo tarutu ida-ne’e perturba no afeta mós ema-nia integridade balun bele kanek.
“Nune’e, alerta ba PNTL atu bele haree ba ema-ne’ebé faan fogete no liuliu ALFANDEGA iha fronteira atu kontrola fogete sira no vijilánsia Unidade Polísia Fronteira (UPF ), nune’e labele tama mai rai-laran,” nia dehan.
Deputadu komisaun B ne’e husu mós PNTL atu halo vijilánsia no ba líder komunitáriu sira alerta komunidade sira atu labele utiliza sasán ne’e.
“Nune’e husu PNTL atu alerta bandu labele faan arbiru de’it, tanba buat ne’e la’ós ema faan arbiru de’it. Maibé, tenke iha loza apropriadu no iha lisensa mak faan, maibé ita haree fogete ilegál barak tama husi fronteira husi Atambua mak mai,’’ nia hateten.
Vise Ministru ba asuntu Parlamentár, Adérito Hugo da Costa, hateten ne’e kestaun ida kada tinan sempre akontese espera komandu jerál PNTL bele halo regulamentasaun.
Nune’e atividade sira-ne’e bele bandu ou regulariza di’ak liután ba aktu sira-ne’e pertubra orden públiku no perturba sarani sira tuir eventu boot sira hanesan loron natál no tinan foun la ho pániku.
“Tanba antes ne’e uzu fogete demaziadu la kontroladu, nune’e iha regra anteriór bandu importa fogete. Maibé realidade sasán ne’e akontese hela, tanba ita-nia frakeza kontrola iha fronteira dalaruma tama husi dalan ilegál nune’e sees husi ita-nia kontrolu,’’ nia dehan.
Nune’e preokupasaun públiku nian ne’e sei kontinua hato’o ba Ministériu Interiór ho PNTL atu organiza didi’ak liután jestaun kontrolu iha fronteira.
Jornalista : Nelson de Sousa
Editór : Cancio Ximenes
