DILI, 02 dezembru 2024 (TATOLI) – Komandante Eskuradra Dom Aleixo Inspetór Polísia Alexandrino da Costa “Alex Samurai”, dehan servisu ida-ne’e, ohin, segunda-feira (02/12), entrega ona kna’ar ba segundu komandante hodi kontinua lidera tanba husik kna’ar ida-ne’e hodi muda ba Unidade Espesiál Polísia (UEP). mudansa ne’e akontese tanba simu karta ida husi Komandante Jerál Polísia Nasionál Timor-Leste (PNTL) kona-ba rotasaun servisu.
“Hanesan instituisaun polísia, klaru ke sempre iha rotasaun. Transferénsia ne’ebé mai ha’u ne’e Komandante Jerál mak foti. Prontu, hanesan Ofisiál Superiór prontu ba fila fali Unidade Espesiál Polísia, ha’u-nia fatin uluk ha’u servisu ba, portantu ida-ne’e mak desizaun hanesan ofisiál superior, ha’u kumpre”, Samurai hateten ba TATOLI iha kampu Prizaun Becora, kinta semana kotuk.
Nia subliña, hahú ohin, tersa (02/12), entrega servisu ne’e ba segundu komandante hodi kontinua lidera eskuadra Dom Aleixo ba oin.
“Kuandu iha buat ruma mak lalos, ha’u prontu ba hatán. Maibé hanesan membru PNTL kontinua hatudu profisionalizmu hodi kumpre desizaun komandu nian”, nia adianta.
Ofisiál Superiór PNTL ne’e rekorda katak mandatu ida-ne’e dezde 2022 no servisu hamutuk ho autoridade lokál, komunidade sira no estudante sira halo sosializasaun hodi tama sai bairru husi eskola ba eskola hodi konsiensializa komunidade sira atu prevene aan husi konflitu no mós halo atuasaun sira tuir lei no orden komandu nian.
“Ida-ne’e mak ha’u nia orgullu maibé loron to’o ona katak desizaun ne’e mai hosi Komisáriu para muda ita tenke submete ba desizaun”, nia afirma.
Komandante eskuadra lamenta mós katak mandatu ida-ne’e durante tinan tolu maibé nunka hetan apresiasaun ruma, maske autoridade loka no NGO sira sempre orgullu lideransa ne’ebé hola ne’e.
“Autorididade lokál no NGO sira sempre orgullu ba ha’u-nia servisu ida-ne’e, mas fim ke ita kuandru ne’ebé sem iha apresiasaun ou valoriza ba ita-nian servisu tomak ne’ebé ita sakrifika durante ne’e, maibé hanesan juventude loriku asuwa’in no veteranu ida ba ha’u laiha problema tanba ha’u iha instituisaun polísia ne’e sura mós ho ha’u”, nia konklui.
Jornalista: Natalino Costa
Editór : Zezito Silva
