VIQUEQUE, 02 dezembru 2024 (TATOLI)-Governu liuhusi Ministériu Administrasaun Estatal (MAE), distribui ona motorizada ba xefe suku sira hamutuk unidade 72 ne’ebé asegura iha resintu administrasaun munisípiu Viqueque, hafoin halo inspensaun molok distribui ba xefe suku 36.
“Motorizada ba xefe suky sira-ne’e ami simu iha loron 26 novembru ne’e. Ohin (segunda) ami halo inspesaun ba kada motorizada unidade 72, depois ami halo inspesaun hotu sei relata ba ekipa MAE hodi mai kontinua halo inspesaun no lori save no barkot atu taka ba motorrizada sira-ne’e, molok entrega ba ba xefe suku sira”, Diretór Servisu Apoiu Sosiadade Sivíl munisípiu Viqueque, Cosme Sarmento,hateten ba TATOLI, iha resintu munisípiu Viqueque, ohin.
Tuir nia prosesu distribuisaun motorizada ba xefe suku no pesoal apoiu suku sira-ne’e sei realiza iha Dezembru ne’e bainhira prosesu inspesaun ramata, kada suku ida sei simu motoriza bo’ot ida no ki’ik ida ne’ebé kada suku hetan motorizada rua.
“Motorizada boot ho marka Verza unidade 36 no motorizada Revo iha unidade 36. Motorizada Verza ne’e ita sei fó ba xefe suku sira no motorizada revo ne’e ba pesoal apoiu suku sira hodi uza ba servisu”, nia afirma.
Nia esplika tan kada suku iha funsionáriu apoiu na’in haat, maibé motorizada ne’e sei reprezenta sekeretáriu suku maka simu, depois sira uza hamutuk hodi hala’o servisu ka atividade suku nian.
“Ha’u fiar katak ho fasilidade sira-ne’e bele faslita ita-nia funsionáriu suku no mós ita-nia xefe suku sira iha baze hodi halo atendimentu ba ita-nia komunidade sira iha área rurál”, nia subliña.
Iha distribuisaun motorizada sira-ne’e postu Lacluta suku haat sei simu motorizada ualu, bo’ot haat, ki’it haat, postu Viqueque Vila suku 10, motorizada aloka unidade 20, bo’ot unidade 10 no ki’ik 10.
Enkuantu, ba postu Ossu suku 10, motorizida unidade 20, motorizada bo’ot 10, motoriza ki’ik unidade 10, postu Uatulari suku neen, aloka motorizada unidade 12, motoriza bo’ot unidade 6, motorizada ki’ik unidade neen no postu Uatucarbau iha suku neen, aloka motorizada unidade 12, motoriza bo’ot unidade 6, motorizada ki’ik unidade neen.
Jornalista : Vitorino Lopes da Costa
Editór : Florencio Miranda Ximenes
