DILI, 02 dezembru 2024 (TATOLI)— Embaixada Repúblika Indonézia liuhosi Sentru Kulturál Indonézia, ohin, hala’o serimónia despedida ba profesór Timor-Leste na’in 17 ne’ebé hetan bolsa mestradu ba programa estudu Bahasa Indonésia (BIPA) ne’ebé sei ba Universidade Edukasaun Indonézia Bandung.
Adidu edukasaun no kultura iha Embaixada Indonézia Dili, Ikhfan Haris, hateten estudante potensiál sira ne’e, antes ne’e, tuir ona palestra online durante semestre rua no kontinua palestra prezensiál durante tinan ida.
“Ohin Sentru Kulturál Indonézia Embaixada Indonézia iha Díli liberta estudante potensiál mestradu programa estudu BIPA na’in 17 ne’ebé sei ba Universidade Ensinu Indonézia iha Bandung. Tuir loloos sira estuda ona online, entaun sira ne’e Profesór lian Indonézia ne’ebé hetan ona oportunidade atu bele ba estuda”, Adidu Edukasaun no Kultura iha Embaixada Indonézia Dili, Ikhan Haris, hateten ba jornalista sira iha PBI Mascarinhas, ohin.
Nia afirma, UPI Bandung nu’udar programa estudu úniku iha Indonézia ne’ebé foka liu ba polítika programa estudu edukasionál.
“Ida-ne’e hanesan ami-nia programa diplomasia ida, liuliu iha reforsa aprendizajen lian Indonézia iha Timor-Leste. Hanesan ita hatene iha kuríkulum, hanorin lian Indonézia, maske semana ida dala rua de’it. Tanba ne’e mak buat importante ida iha implementasaun ida-ne’e mak kurríkulu, kualifikasaun no kompeténsia husi mestre sira, entaun ida-ne’e mak ami-nia pasu hodi fó oportunidade ba estudu mestradu tuirmai ba profesór lian Indonézia sira”, nia afirma.
Nia esplika, programa ne’e ba faze daruak, antes ne’e, iha profesór na’in rua ne’ebé kontinua ona estudu mestradu iha Jogja State University ba programa estudu edukasaun.
Iha fatin hanesan, Profesór husi ESSA Baucau, Gil Tome Ribeiro, dehan tuir loloos atu sai iha fulan-Fevereiru 2024, maibé tanba problema pasaporte iha TL, sira tuir aula online durante tinan ida.
“Ami na’in 17 ne’e mai husi akadémika, tanba ne’e ho bolsu estudu ne’e ami sei kolabora ho Ministériu Edukasaun hodi hasa’e estudante sira-nia koñesimentu kona-ba lian sira, liuliu lian Indonézia”, Gil Tome Ribeiro konklui.
Profesór sira ne’e hetan bolsu estudu ba programa estudu mestradu ne’e mai husi Munisípu Baucau, Lautem, Viqueque, Ermera, Dili, Liquiça no Manatuto.
Jornalista : Felicidade Ximenes
Editór : Zezito Silva
