DILI, 03 dezembru 2024 (TATOLI)—Deputada Partidu Demokrátiku (PD), Sanchia Tilman, husu Ministériu Obras Públika (MOP) atu hadi’a estrada iha Tasi-Tolu ba Maslidun iha munisípiu Dili.
“Husu MOP atu haree tanba tempu udan boot ne’e estrada taho barak ne’ebé difikulta tebes movimentu komunidade ba-mai no estudante sira atu ba eskola,” Deputadu PD ne’e levanta liuhusi reuniaun plenária PN, tersa ne’e.
Deputada CNRT, Marcos Martins, rekomenda MOP atu orienta Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) atu taka dalan ko’ak husi Tibar ba to’o kapitál Gleno, tanba dalan iha ne’eba ko’ak barak difikulta tebes movimentu ambulánsia ho transporte públiku.
Nia mós hato’o preokupasaun povu Ermera nian relasiona ho eletrisidade mate hela de’it iha Ermera, nune’e husu atu halo manutensaun fiu ne’ebé utiliza dezde tempu indonézia.
Deputadu CNRT, Domingos Augusto “Deker”,’ sekunda mós ho ahi mate beibeik iha Ermera dalaruma to’o semana rua, nune’e husu atensaun liuliu ba tékniku EDTL atu halo manutesaun rutina.
Deputada KHUNTO, Olinda Guterres, husu MOP tau atensaun liuliu iha tempu udan atu bele normaliza situasaun emerjénsia sira ho lalais, hanesan iha udan boot loron rua liubá ne’e akontese iha Hera kauza husi mota boot bee tama komunidade nia toos hodi estraga batar, modo no seluk ne’ebé kuda, nune’e presiza normalizasaun urjénsia.
Durante plenária, deputadu sira balun mós foti preokupasaun povu nian relasiona ho rede internet ladi’ak liuliu to’o ba povu iha área rurál atu halo komunikasaun, inklui iha área rurál iha aldeia balun seidauk asesu liña eletrisidade, inklui infraestrutura bázika hanesan estrada iha área rural, nune’e husu atu Governu tau atensaun iha implementasaun Orsamentu Jerál Estadu (OJE) 2025.
Hatán ba ne’e, Vise Ministru ba asuntu Parlamentár, Adérito Hugo da Costa, rejista preokupasaun sira kona-ba manutesaun estrada sei envia ba ministériu tutela atu tau atensaun.
Governante ne’e mós rekoñese, kona-ba preokupasaun liña telekomunikasaun ikus-ikus kualidade liña tun ba beibeik iha fatin balun, nune’e Ministériu Transporte Telekomunikasaun (MTK) ho koordenasaun ne’ebé iha haree ho operadór sira atu elava kapasidade kobertura.
Kona-ba eletrisidade hanoin akontese iha territóriu, kontajen ne’e tun sa’e no halo komunidade nia sasán eletróniku aat, nune’e tau iha konsiderasaun iha reuniaun Konsellu Ministru sei hato’o hodi nune’e ministériu relevante haree atu atensaun.
Jornalista : Nelson de Sousa
Editór : Cancio Ximenes
