VIQUEQUE, 03 dezembru 2024 (TATOLI)-Prezidente Autoridade Munisípiu (PAM) Viqueque, Francisco Cruz Simões De Gonzaga Soares, tersa ne’e, akompaña husi Komadante Polísia Nasionál Timor Leste (PNTL) munisípiu Viqueque, Superintendente António Rego Fernandes, vizita direta ba fatin projetu konstrusaun edifísiu foun ba eskola pré-eskolár, iha área Cabira-Oan, suku Caraubalu, postu Viqueque Vila, munisípiu Viqueque.
PAM Viqueque hateten, vizita ida-ne’e halo atuasaun ba empreza hodi hapara projetu konstrusaun edifísiu Pré-Eskolár ho razaun tanba tékniku sira husi Ministériu Edukasaun (ME) la halo estudu klean ba fatin kontrusaun, fatin ne’e risku ba dezastre no afeta mós ba estudante sira.
“Rai pedasuk oan ida-ne’e risku teb-tebes, tanba karreta kuandu halai iha estrada leten ne’ebá, maka hetan asidente trafiku ruma, nia tenke monu tun mai, sei kona edifísiu eskola nian. Entaun sei fó afeta ba ita-nia oan sira-nia vida, ita lakogi akontese buat sira-ne’e. Ho ida-ne’e ha’u hanoin fatin konstrusaun ida-ne’e la serve hodi kontinua konstrui edifísiu Pré-Eskolár. Tanba ne’e, maka ha’u halo impedementu no ha’u sei la fó autorizasaun hodi kontinua konstrusaun”, PAM Viqueque ne’e hateten ba TATOLI, iha fatin konstrusaun, Cabira-Oan, ohin.
PAM Viqueque ne’e profunda, hapara projetu ida-ne’e autoridade sei buka rai iha fatin seluk, hodi oferese ba ME, atu konstrui fila fali edifísiu Pré-Eskolár ne’ebé dignu no kondusivu ba estudante sira-nia vida.
“Se kontinua projetu ida-ne’e, ba futuru maka akontese buat ruma ita fó todan ba se?. Ita iha alternativu ida atu kontinua konstrusaun edifísiu ida-ne’e, ita buka rai seluk maka halo konstrusaun. Tanba antes ne’e, ha’u haruka ona pedidu ba diresaun nasionál infraestutura husi ME no Ministra rasik hodi hapara konstrusaun, maibé ME to’o agora seidauk fó resposta. Nune’e mós ha’u haruka ona karta ba empreza responsavél atu hapara. Hodi hein ekipa ME haree fatin ida-ne’e elejivél”, nia haktuir.
Nia dehan, área ida-ne’e risku, hakarak hadi’a sai hanesan tipu jardin hodi kuda ai-funan ruma, la’ós kria edifísiu hodi ema tuur.
“Se ba oin empreza kontinua halo konstrusaun, ha’u sei foti medida regirozu hasoru empreza. Tan ne’e, ohin ha’u lori hotu PNTL hodi haree direta observa ba fatin konstrusaun. Iha fatin ne’e, tempu portugés no okupasaun Indonézia akontese bei-beik asidente iha fatin referida”. Nia hato’o.
Iha fatin ketak, Diretór Servisu Edukasaun munisípiu Viqueque, Julio Sakadura, subliña, kona-ba atuasaun PAM Viqueque hapara prosesu konstrusaun edufísiu Pré-Eskolár ne’e kompeténsia autoridade nian.
“Ba ami laiha intervensaun ruma hasoru autoridade tanba ne’e kompeténsia autoridadr nian. Ami-nia desizaun maka suporta ba dezenvolvimentu edukasaun iha munisípiu Viqueque hodi fó benifísia ba estudante sira. Sé fatin risku ami iha kompeténsia hato’o ba nasionál hodi asegura eskola, ne’ebé ba desizaun atu hapara konstrusaun ne’e ha’u la aseita”. nia realsa.
Empreza prontu koopera
Entretantu, Reprezentante Empreza Carnesia Rekordasaun Unipesoal, LDA, Constantinho Guterres, hateten, empreza Carnesia Rekordasaun prontu koopera ba desizaun autoridade munisípiu Viqueque hodi hapara servisu konstrusaun edifísiu Pré-Eskolár, iha área Cabira-Oan, postu Viqueque Vila, minisípiu Viqueque.
“Sim, iha loron tersa, PAM hapara ona servisu konstrusaun Pré-Eskolár, ne’ebé ohin ami-nia traballadór sira la servisu ona. Nune’e desizaun ne’ebé PAM Viqueque foti, ba ami prontu halo tuir ordem ne’ebé PAM fó ba ami”, Costantinho Guterres, hateten ba Tatoli, liuhusi telefónika, ohin.
Nia klarifika, projetu konstrusaun edifísiu Pré-Eskolár husi Ministériu Edukasaun (ME), maka loke konkursu públiku iha nasionál ba empreza hotu hodi kompete, iha rezultadu finál empreza Carnesia Rekordasaun sai manán hodi konstrui edifísiu referida ho kontratu servisu ho durasaun fulan neen.
“Molok, ami hahú halo servisu konstrusaun, ami fó koñesementu ba seguransa, administradór postu Viqueque Vila no Prezidente Autoridade Munisípiu Viqueque rasik, ne’ebé prosesu insiu servisu buat hotu la’o di’ak, laiha problema ruma. Maibé ikus hapara”, nia haktuir.
PAM halo impedementu ba konstrusaun eskola tanba kestaun dalan ne’ebé liga ba postu Lacluta sai risku ba edifísiu Pré-Eskolár, tanba ida-ne’e PAM halo impedementu servisu kontrusaun.
“Maibé, PAM foti ona desizaun hapara ami-nia servisu. Entaun ami konsidera katak ami la halo krime ruma. Sé PAM hapara servisu impaktu ba estudante no empreza responsavél konstrusaun tanba to’o tempu durasaun kontratu, maka projetu la hotu, ami empreza sei hetan sasaun husi projetu na’in husi ME”, nia relata.
Progresu konstrusaun nia dehan, empreza konstrui hahú husi kee pondasi uma, hada pondasi uma nian no materiál konstrusaun sementi, rai henek, fatuk inklui selu badaen.
“Husi prosesu insiu to’o agora ami konta hamutuk ne’e empreza gastu kuaze $20,000.00 resin ona. Nune’e Autoridade hapara projetu tenke responsavél buka fatin foun hodi halo konstrusaun nomós PAM tenke respnsavél ba ami-nia osan ne’ebé ami gasta ona ba prosesu konstrusaun ne’ebé ami gasta dadauk ne’e”. Nia hato’o.
Entretantu, projetu konstrusaun edifísiu Pré-Eskolár husi ME ne’ebé hahú halo konstrusaun fíziku iha fulan Outubru 2024 no finaliza fulan Marsu 2025 obra ne’e gasta orsamentu totál hamutuk $108,251.35.
Projetu referida responsavél husi empreza Carnesia Rekordasaun Unip, LDA. Progresu servisu ba konstrusaun Pré-Eskolár ne’e badaen sira hahú hada pondasi uma nian ne’ebé seidauk ramata.
Jornalista: Vitorino Lopes da Costa
Editór: Florencio Miranda Ximenes
