VIQUEQUE, 03 dezembru 2024 (TATOLI)- Ofisiál Organizasaun Rais Hadomi Timor-Oan (RHTO) iha munisípiu Viqueque, Natalino Pinto, hateten, halo identifika ba ema ho difisiénsia (EhD) iha munisípiu Viqueque sei menus fasilidade apoia ba sira-nia kondisaun.
“Durante ne’e ami haree ita-nia maluk sira ema ho difisiénsia barak maka seidauk iha fasilidade ne’ebé ajuda sira-nian kondisaun hanesan kadeira roda, Plastik suport, sasán liman palsu no ain palsu no terapia tanba ita-nia maluk balun idade nurak, maibé hetan difisiénsia fízikametal”, Natalino Pinto, hateten ba TATOLI,I.P, iha postu Viqueque Vila, ohin.
Nune’e, nia husu ba Governu presiza fó asisténsia masimu ba EhD sira-ne’ebé hela iha área rurál bele heta apoiu fasilidade atu bele ajuda sira movimentu.
RHTO Viqueque sei kontinua halo kooperasaun ho Governu liuhusi Ministériu Sosilidaridade Sosiál no Inkluzaun (MSSI) no Sentru Solidaridade Sosiál munisípiu Viqueque hodi tau matan ba ema ho difisiénte sira.
MSSI prontu apoia Ehd
Hatán ba preokupasaun ne’e, Diretór Servisu Sentru Solidaridade Sosiál munisípiu Viqueque, Geraldo de Carvalho, hateten, preokupasaun ba fasilidade ba ema ho difisiénte sira parte Governu prontu atu apoiu sira, maibé sira rasik la informa ba Sentru Solidaridade Sosiál munisípiu Viqueque.
“Ami-nia sentru reabilitasaun iha fasilidade sira hanesan kadeira no sasán sira-ne’ebé suporta ita-nia maluk ema ho difisiénte sira. Tanba Governu liuhusi MSSI agora dadauk ne’e prontu atu tulun ita-nia maluk sira. Tan ne’e, ami husu ba maluk sira-ne’ebé laiha fasilidade informa ba ami, atu ami bele fó atensaun hodi apoiu fasilidade sira, inklui terapia ba maluk sira-ne’ebé presiza”. nia dehan.
Tuir dadús husi RHTO Viqueque ema ho difisiénsia rejista iha munisípiu Viqueque ho totál 4.016 kompostu husi tipu EhD ba matan, tilun, fíziku no metal.
PAM kompromete atende EhD ho dignu
Entretantu, Prezidente Autoridade Munisípiu (PAM) Viqueque, Francisco Cruz Simões De Gonzaga Soares, hateten, ba oin autoridade sei tau atensaun ba maluk sira [ema ho difisiénsia] fó atendementu dignu ba sira.
“Ita laiha difirensa balu. Tanba ita hotu kriatura husi Maromak nian. Tan ne’e, ita tenke haree malu no tulun malu nu’udar maun no alin”, Autoridade Munisípiu (PAM) Viqueque ne’e hateten, iha ambitu komemorasaun loron mundiál ema ho difisiénsia, iha salaun Tilou, postu Viqueque Vila ohin.
Ba komemorasaun ne’e, PAM Viqueque husu, autoridade postu lima, inklui Xefe Suku sira kontinua buka halo identifika ba maluk sira [ema ho difisiénsia] ne’ebé maka presiza tulun sira liuliu asesu parte administrasaun no seluk tán.
Ema ho defisiensia sente kontente
Prezidente Komisaun Organizadór ba komemorasaun loron mundiál ema ho difisiénsia nivél munisípiu Viqueque, Geraldo de Carvalho, haktuir, komemorasaun ba EhD ho atividade misa, marsa da pás, animasaun no apoia ai-han komplementáriu hanesan foos, dose, susuben no seluk tan ba ema ho difisiénsia iha munisípiu Viqueque.
“Ho komemorasaun ne’e ami kontinua motiva sira tanba ami hakarak ba oin ita servisu ho inkluzivu iha Ministériu Sosilidaridade sosiál nian laran no la husik ema ida iha kotuk”, Nia realsa.
Nia relata, serimónia komemorasaun ne’e EhD mai husi postu lima kada postu ida reprezenta ema na’in-10 hodi partisipa iha komemorasaun.
Reprezenta EhD, Julião Alves Corea, sente kontente partisipa serimónia komemorasaun loron mundiál ba EhD ne’ebé Governu realiza iha munisípiu Viqueque.
“Ha’u sente kontente partisipa iha eventu ida-ne’e, enventu foin primeira realiza iha Viqueque. Ha’u husu ba Governu ba oin kontinua implementa atividade sira-ne’e atu ami bele partisipa hotu”,Julião dehan.
Jornalista : Vitorino Lopes da Costa
Editór : Floréncio Miranda Ximenes
