DILI, 04 dezembru 2024(TATOLI) — Grupu emprezáriu foinsa’e hamutuk 80, balun partisipa ona iha Kompetisaun Negósiu Inovativu (KNI -tetun) hatudu mós sira-nia produtu iha espozisaun anuál Juventude EXPO 2024 ho tema “Estimula Kresimentu, Taka Lakuna: Hakbiit Emprezáriu Foin-sa’e sira ba Ekonomia ne’ebé Diversu no Dinámiku”.
Espozisaun ne’ebé hala’o durante loron tolu, hahú hosi 04 – 06 Dezembru 2024 iha Hotél Timor Dili, hanesan rezultadu hosi kolaborasaun entre Programa Nasaun Unidas ba Dezenvolvimentu (PNUD) liuhosi Projetu Abilidade Empregu no Empreendedorizmu Juventude (YEES) ne’ebé parseria ho Ministériu Komérsiu no Indústria (MKI).
Ministru Komérsiu no Indústria, Filipus Nino Pereira, rekoñese katak joven emprezariál presiza asaun konkreta hodi lori aspirasaun joven sira-nian hodi bele kontribui ba ekonomia rai laran.
“Ezisténsia KNI nian sei aumenta perspetiva foun ba sira no ami halo ona esforsu to’o agora ho grupu juventude liu 300 ne’ebé tuir KNI. Entaun ami hakarak ida-ne’e dezenvolve nafatin ba oin”, Nino Pereira informa iha abertura espozisaun iha Hotel Timor, ohin.
Tuir nia, joven sira tenke transforma oportunidade ne’ebé fó ba sira ba realidade bainhira sira lakohi depende ba rai li’ur, tanba sira realiza invazaun ekonómika la’o hela.
Adjuntu Xefe Reprezentante, Programa Nasaun Unidas ba Dezenvolvimentu iha Timor-Leste, (PNUD), Adeline Carrier subliña, PNUD, liuhusi Projetu YEES, nafatin iha kompromisu atu hasa’e oportunidade ekonómika iha Timor-Leste liuhosi enkoraja empreendedorizmu ne’ebé lidera husi foin-sa’e sira no hasa’e joven sira-nia asesu ba servisu.
“UNDP fó apoiu ba instituisaun xave sira hodi hasa’e oportunidade emprendedorizmu no empregu, inklui hametin enkuadramentu legál no administrativu ba negósiu no empréstimu”, Adeline Carrier afirma.
Projetu YEES ne’ebé hetan apoiu husi Kooperasaun Internasionál Korea (KOICA) iha Timor-Leste dezde tinan 2022 fó ona formasaun empreendedorizmu ba juventude liu 1,300, apoiu joven emprezáriu 430 ho subsídiu hodi hahú sira-nia negósiu rasik.
Diretór País KOICA iha Timor-Leste, Younhwa Kang, hateten katak espozisaun ne’e permite joven emprezáriu sira atu liga, aprende no buras hodi kataliza impaktu ba tempu naruk iha paizajen emprezariál iha Timor-Leste.
“Liuhusi mentorizasaun, formasaun no oportunidade rede, eventu ne’e sei hakbi’it joven sira atu nakfilak sira-nia ideia ba negósiu ne’ebé susesu, kontribui ba kreximentu ekonómiku ne’ebé sustentável iha rai-laran”, Younhwa Kang hateten.
Tuir Tatoli nia observasaun iha terenu, husi grupu 80 ne’e, maioria aprezenta preparasaun ai-han lokál, biskuit lokál, salada ai-fuan, bebidas ho sabor ai-fuan oioin, jus lokál no bebida alkólika lokál, produtu artezanatu hena tais, artezanatu ba ukir ai, artezenatu plástiku resiklajen no produtu inovativu sira seluk.
Espozisaun ne’e oferese mistura úniku husi atividade sira, fó oportunidade ba emprezáriu foin-sa’e sira atu promove sira-nia negósiu no hametin sira-nia komprensaun kona-ba estratéjia emprezariál sira.
Jornalista : Felicidade Ximenes
Editór : Zezito Silva
