DILI, 04 dezembru 2024 (TATOLI) — Governu Japaun fó doasaun besik rihun $230 ba projetu rua hanesan harii Postu Saúde no sistema bee-moos iha Munisípiu Ermera.
Embaixadór Japaun nian iha Timor-Leste, Tetsuya Kimura, hateten asisténsia ne’e fó liuhosi eskema azisténsia dezenvolvimentu Japaun nian, entaun subvensaun asisténsia ba projetu seguransa umanu iha baze ne’ebé hamuutk liu $140,000 ba Postu Saúde no $89,367 ba sistema fornesimentu bee-moos.
“Ohin ami sei asina kontratu GGP foun rua, mak Asosiasaun Juventude Mileniál sei harii postu saúde iha Suku Humboe no Alfa Star sei harii sistema bee-moos iha Aldeia Hatete, Suku Manusae iha Munisípiu Ermera, entaun GGP implementa ona projetu 16 iha Munisípiu Ermera”, Tetsuya Kimura dehan iha komunikadu imprensa ne’ebé Tatoli asesu, ohin.
Governu Japaun ativa ona projetu oioin iha Timor-Leste, hahú husi dezenvolvimentu infraestrutura ho eskala boot no apoiu industriál to’o projetu ho eskala ki’ik ne’ebé fó benefísiu diretamente ba komunidade lokál sira. Tinan ida-ne’e marka aniversáriu ba dala 25 hosi kooperasaun Japaun nian ho nasaun ne’e.
Ministru Obras Públika, Samuel Marçal, hateten Governu Japaun apoia bele fó benifísiu ba Governu Timor-Leste.
“Governu Timor-Leste preokupa duni ho apoiu ida-ne’e, tanba ne’e ita hotu tenke agradese ba Governu Japaun no Povu Japaun. Ohin ha’u dehan katak maske ema Japaun dook husi ita, maibé sira-nia fuan besik tebes ba ita Timor”, Ministru Obras Públika Samuel afirma.
Dezde 1999, ONG Japaun, timoroan sira no organizasaun internasionál sira, Japaun implementa ona projetu neen-nulu (60) relasiona ho saúde iha nasaun laran tomak.
Partisipa iha serimónia asinatura ne’e, Prezidente Autoridade Munisípiu Ermera, Jose Martinho dos Santos Soares, Adelia Maria M. Barreto, Diretora Jerál Unidade Jestaun Projetu Saúde, reprezentante BTL, EP no lideransa komunitária sira seluk.
Jornalista : Felicidade Ximenes
Editór : Zezito Silva
