DILI, 04 dezembru 2024 (TATOLI) – Governu liuhusi reuniaun Konsellu Ministru, kuarta ne’e, iha Palásiu Governu Dili, diskute no aprova projetu Dekretu-Lei, ne’ebé aprezenta husi Ministru Defeza, Donaciano do Rosário Gomes, kona-ba promosaun exesionál ba Militár sira husi FALINTIL-Forsa Defeza Timor-Leste (F-FDTL).
“Diploma ida-ne’e ho intensaun atu dispensa rekizitu sira lisensiatura nian atu tama iha kategoria ofisiál no grau baxarél ka ensinu sekundáriu ne’ebé komplementa ho formasaun militár atu tama iha kategoria sarjentu,” Vise-Ministru Asuntu Parlamentár Aderito Hugo da Costa hateten.
Nia dehan, desizaun ne’e ho objetivu atu rekoñese no asegura progresaun karreira husi militár sira ne’ebé tama ona molok Estatutu Militár tinan 2014 nian tama iha vigór, hodi salvaguarda espetativa lejítima sira ne’ebé kria ona. Diploma ne’e sei prodús efeitu hahú iha loron 01 fulan-janeiru tinan 2024.
Aprova pagamentu suplementar
Alende ne’e, Konsellu Ministru aprova mós projetu Dekretu-Lei, ne’ebé aprezenta mós husi Ministru Defeza, Donaciano do Rosário Gomes, kona-ba pagamentu suplementár ba militár F-FDTL no funsionáriu no ajente administrativu sira iha Ministériu Defeza ne’ebé envolve iha prosesu ba rekrutamentu espesiál tinan 2023.
“Objetivu husi medida ida-ne’e mak atu fó kompensasaun ba esforsu estraordináriu no rekoñese empeñu profisionál militár, funsionáriu no ajente administrativu sira nian ne’ebé partisipa iha prosedimentu rekrutamentu ida-ne’e. Pagamentu suplementár ne’e reflete dedikasaun ne’ebé hatudu ona ho objetivu atu hamenus kondisaun serbisu ne’ebé ezijente, inklui restrisaun ba liberdade pesoál no nivel penozidade ne’ebé aas kona-ba funsaun ne’ebé dezempeña,” Governante ne’e tenik.
Valór suplementu ne’e kalkula proporsionalmente, haree ba volume serbisu nian no oras serbisu ne’ebé realiza duni.
Iha parte seluk, Aprova mós projetu Rezolusaun Governu, ne’ebé aprezenta mós husi Ministru Defeza, kona-ba Estratéjia Apoiu Umanitáriu no Emerjénsia nian.
Estratéjia ne’e promove orientasaun no liña asaun inovadora lubun ida ne’ebé ho objetivu atu otimiza kapasidade no prontidaun Forsa Armada (F-FDTL) sira nian, hodi garante resposta ida ne’ebé rápida, efikás no efisiente kona-ba nesesidade populasaun sira ne’ebé afeta husi situasaun umanitária no emerjénsia.
Iha ámbitu hosi Estratéjia ida-ne’e, aprova mós kriasaun Unidade ba Koordenasaun Apoiu Umanitáriu no Emerjénsia, ne’ebé tutela hosi Ministériu Defeza.
Objetivu hosi unidade ida-ne’e mak atu implementa Estratéjia, hodi promove abordajen koordenada ida entre entidade públika oioin ho koñesimentu no esperiénsia iha setór ne’e.
Koordenasaun ne’e sei lidera husi personalidade ida ne’ebé nomeia husi membru Governu responsavel ba área defeza nian no sei konta ho reprezentante sira husi área defeza, administrasaun estatál, interiór, saúde no seguransa sosiál nian ne’ebé sei atua nu’udar pontu fokál. Regra husi organizasaun no funsionamentu ba Unidade Koordenasaun ne’e sei define liuhosi despaxu ministeriál husi Ministru Defeza.
Jornalista: Hortencio Sanchez
Editór: Florencio Miranda Ximenes
