DILI, 04 dezembru 2024 (TATOLI) – Ministru Juventude, Desportu, Arte no Kultura (MJDAK), Nelyo Isaac Sarmento, kuarta ne’e, aprezenta relatóriu kona-ba partisipasaun iha Konferénsia Ministru Juventude no Desportu Komunidade País Lian Portugés (CPLP) ba dala 15, ne’ebé hala’o ‘o iha Cascais, Portugál , husi loron 12 to’o 16 Novembru.
Iha reuniaun Konsellu Ministru ne’e Ministru Nelyo aprezenta mós kona-ba tinan oin iha fulan jullu Timor-Leste sei sai uma-na’in ba konferénsia Juventude Desportu CPLP no jogu desportiva CPLP, nune’e projetu rezolusaun ne’e hetan aprovasaun husi Konsellu Minustru.
“Konsellu Ministru aprova projetu rezolusaun ne’ebé kria Komisaun Eventuál Interministeriál ne’ebé responsável ba koordenasaun atividade sira ne’ebé relasiona ho realizasaun Konferénsia Ministeriál Juventude no Desportu CPLP ba dala XVI no Jogu Desportu CPLP ba dala XII, ne’ebé sei hala’o iha o iha Dili, husi loron 17 to’o 27 Jullu 2025,” Vise-Ministru Asuntu Parlamentár Aderito Hugo da Costa hateten.
Kona-ba realizasaun eventu sira-ne’e, Governu prepara ona orsamentu hamutuk $3.730.500 ne’ebé hetan ona aprovasaun.
Komisaun, ne’ebé prezide husi MJDAK, sei kompostu husi reprezentante sira husi ministériu oioin no sei hetan apoiu husi Unidade Téknika ida, responsável ba preparasaun no implementasaun husi Planu Diretór ba eventu sira.
Estrutura ida-ne’e sei koordena asaun sira iha área lojístika, komunikasaun, angariasaun fundu, no promosaun igualdade jéneru no inkluzaun sosiál, hodi garante koordenasaun interdepartamentál no komunikasaun efetiva ho delegasaun sira hosi nasaun partisipante sira.
Eventu sira sei halibur partisipante na’in 772, inklui delegadu sira no atleta sira husi nasaun membru sira CPLP nian, hodi promove kooperasaun, solidariedade no amizade entre povu luzófonu sira, liuhosi desportu no juventude sira. Komisaun ne’e sei disolve hafoin aprezentasaun relatóriu finál ba Primeiru-Ministru.
Jornalista: Hortencio Sanchez
Editór: Florencio Miranda Ximenes
