VIQUEQUE, 04 dezembru 2024 (TATOLI)- Ekipa Ministériu Interiór (MI) kompostu husi inspitór Komandu Polísia Nasionál Timor Leste (PNTL) Nasionál, kuarta ne’e, sosializa kona-ba promosaun tranzitória deviza ba membru PNTL sira, iha munisípiu Viqueque.
Tuir Xefe Ekipa transitóriu PNTL, Paulo Asis Belo, esplika, ekipa MI no PNTL halo sosializa estatutu PNTL ne’ebé foin lalais Prezidente Repúblika (PR) promulga iha Outubru 2024 liuliu artigu 155 kona-ba promosaun tranzitóriu nian.
“Ita hatene polísia barak maka diviza balun tinan 10 no ba liu, maibé seidauk promove. Tanba ne’e, Governu hanoin halo promosaun tranzitóriu ba membru PNTL ne’ebé seidauk promove diviza. Nune’e iha artigu 155, iha modalidade hamutuk neen”, Paulo Asis Belo, hateten ba jornalista sira, iha Komandu PNTL, Beskem, ohin.
Nia relata, modalidade dahuluk ko’alia kona-ba membru PNTL antigu husi tinan 10 to’o tinan 20 ne’ebé seidauk promove, Governu hakarak promove ba superiór, modalidade rua membru PNTL ne’ebé vetetanu, modalidade datoluk maka membru PNTL vitima krize 2006 no krize 2008 ne’ebé metin iha instituisaun PNTL, modalidade dahaat membru PNTL husi klase 1 to’o klase 25, modalidade dalima membru PNTL ho idade 50 ba leten no modalidade da ikus maka membru PNTL sira-ne’ebé servisu iha tempu UNTAET nian, husi modalidade sira-ne’e maka Governu atu promove sira.
“Tan ne’e,maka ami mai Viqueque hodi halo sosializa ba membru PNTL sira atu hatene estatutu ida-ne’e hodi priense formulariu ba modalidade sira-ne’e hodi Governu halo rezolusaun atu promove sira”, nia realsa
Ekipa kontinua halo sosializa ba munisípiu hotu-hotu bainhira ramata sosializa ekipa sei prepara proposta aprezenta ba MI hodi aprezenta ba Konsellu Ministru
“Kona-ba dadús membru PNTL ne’ebé atu simu promosaun ne’e seidauk, daudaun ne’e ami distribui hela formulariu ba membru PNTL sira priense, depois ami analiza foin maka ami hatene, ne’ebé agora ne’e dadús ema na’in hira ne’e simu promosaun seidauk”. tenik nia.
Iha fatin hanesan, Komadante PNTL munisípiu Viqueque, Superintendente António Rego Fernandes, husu agradese ba ekipa MI no PNTL ne’ebé mai halo sosializa ba membru PNTL iha munisípiu Viqueque.
“Ha’u sente planu promosaun ida-ne’e akontese bele rezolve ona problema estrutura PNTL iha munisípiu Viqueque. Daudaun ne’e estrutura Ajente xefe ema na’in-2, ofisiais na’in-6, enkuantu komadante eskudra PNTL maioria diviza sarjentu maka asume kna’ar nu’udar komandante no membru PNTL maioria sira iha nivel sarjentu maka barak. Ha’u hanoin promosaun diviza tenke kria hodi priense estrutura”, nia hato’o.
Nune’e, Komandante ne’e konvida hotu komadante eskuadra no membru PNTL sira partisipa hotu iha sosializa, atu bele komprende ba promosaun tranzitóriu ida-ne’e.
Enkuantu, tuir dadús membru PNTL efetivu iha munisípiu na’in-137 ne’ebé koloka iha postu lima.
Jornalista : Vitorino Lopes da Costa
Editór : Florencio Miranda Ximenes
