DILI, 04 dezembru 2024 (TATOLI) – Ekipa selesaun nasionál Timor-Leste seniór, ohin, bá ona Vietname ho aviaun Aero Dili hodi kompete iha jogu ASEAN Mitsubishi Electric Cup 2024, ne’ebé sei hala’o iha nasaun Vietname fulan ne’e.
“Sim, ohin ita nia ekipa selesaun aranka ona ba Vietnam hodi tuir kompetisaun AMEC,” Diretór Kompetisaun no Futeból Profesionál Federasaun Futeból Timor-Leste (FFTL) Frederico Martins hateten ba Agência TATOLI iha Dili, kuarta ne’e.
Ekipa selesaun nasionál senior Timor-Leste lidera hosi treinadór Simón Elissetche.
Tuir sorteiu ne’ebé dada ona iha fulan hira ba kotuk Timor-Leste monu iha grupu A kompostu hosi nasaun sira hanesan, Thailandia, Malázia, Sigapura no Kamboja.
Entretantu, grupu B kompostu hosi nasaun sira hanesan, Indonézia, Laos, Myanmar, Filipina no nasaun uma-na’in Vietnam.
Tuir orariu ne’ebé iha iha loron 08 fulan-dezembru Timor-Leste sei joga hasoru Thailandia. Iha loron 11 fulan-dezembru ekipa Timor-Leste sei kontra Malázia.
Enkuantu iha loron 14 fulan-dezembru Timor-Leste sei kontra Singapura no ikus liu iha loron 17 fulan dezembru ekipa Lafaek sei joga kontra Kamboja.
Jornalista: Hortencio Sanchez
Editór: Florencio Miranda Ximenes
