DILI, 05 dezembru 2024 (TATOLI) – Primeiru-Ministru, Kay Rala Xanana Gusmão, kinta ne’e, iha Palásiu Prezidensiál Dili hasoru malu ho Prezidente Repúblika (PR), José Ramos-Horta, hodi informa mós Governu deside ona iha Konsellu Ministru fó naran ba Ponte foun Casnafar ho naran Ponte Kofi Annan.
“Informa ona ba Prezidente kona-ba horsehik ami iha Konsellu Ministru delibera hodi fó naran ba Ponte foun Comoro Mota-Ulun (Casnafar) ho naran Kofi Annan, Eis Sekretáriu-Jerál Nasaun Unida,” PM Xanana informa.
Nia dehan, Ponte iha Bidau tau ona naran B J Habibie no iha parte Comoro nia ulun tau fali Kofi Annan. Ho naran ne’ebé Governu tau ona ba Ponte ne’e, Prezidente Repúblika kontente no aseita.
“Prezidente kontente no aseita ho naran ne’ebé tau ba Ponte ne’e, tanba nia mós kontribui ba Timor-Leste nia independensia,” PM Xanana afirma.
Ponte Casnafar
Governu husi Ministeriu Obra Públika,konstrui ponte foun Casnafar iha Suku Bokolelo no Suku Dare ,Ponstu Administrativu Laulara munisipiu Aileu no postu administrativu Vera-Cruz, munisipiu Dili atu bele fasilita movimentu transporte no ema.
Nune’e, Governu prevee orsamentu liuhusi Fundu Infraestrutura (FI) ho montante $3.632.896.18.
Konstrui husi Empreza Carya Timor-Leste,Lda iha loron 24 Novembru 2023, tuir planu konstrusaun sei ramata iha fulan-agostu tinan oin.
Konstrusaun ponte Casnafar tuir medida ne’ebé mensiona iha kontratu ho 70 metru, maibe husi empreza Carya Timor-Leste,Lda oferese tan 10 metru ba Governu Timor-Leste, nune’e Ponte Casnafar nia medida hamutuk 80 metru. Daudaun ne’e, Governu halo ona pagamentu ba empreza ho pursentu 24,90
Antes ne’e, iha loron 26 Novembro 2023, Vise-Primeiru Ministru no Ministru Koordenador Asuntu Ekonomiku no Ministru Turizmu no Ambiente, Francisco Kalbuadi Lay, akompaña husi Ministru Obra Públika-Samuel Marçal no Ministru Planeamento Estratejiku-Gastão de Sousa hala’o lansamentu dahuluk ba ponte Casnafar.
Jornalista: Hortencio Sanchez
Editór: Florencio Miranda Ximenes
