DILI, 05 dezembru 2024 (TATOLI)—Komisaun A trata asuntu Justisa no Konstituisionál iha Parlamentu Nasionál (PN), sei haree fali inisiativa proposta-lei sibernétika ne’ebé antes ne’e kaduka iha lejislatura dalima, hodi nune’e bele regula sidadaun utiliza sala rede sosiál hodi kria identifade falsu (ID falsu) ataka ema-nia personalidade.
“Planu Komisaun A nian iha tempu badak ami sei haree, tanba ne’e importante tebes iha lejislatura dalima ita inísia ona maibé kaduka tiha, tanba ita tama ona ba tinan polítika,” Vise Prezidente Komisaun A, António Verdiál de Sousa, hateten ba jornalista sira iha resintu PN, kinta ne’e.
Tanba ne’e, Komisaun iha tempu badak sei haree inisiativa no hein to’o tinan oin bele iha ona lejislasaun.
Deputadu membru komisaun A, Joaquim dos Santos “Boraluli”, hateten iha Governu Konstituisaun da-sia (IX) aprezenta ona inisiativa ne’e maibé kaduka tiha iha komisaun la konsege diskute, hanoin tenke kontrola sistema informasaun informátika hodi ema labele uza sala atu halo violasaun ema seluk nia direitu.
Tanba ne’e, ba oin Deputadu sira no Governu bele aprezenta fali inisiativa, tanba ne’e hein iha inisiativa ruma ne’e pronto fó apoia.
Mezmu, Nia dehan agora seida’uk iha lei sibernetika bainhira ema ida sente nia direitu violadu lori ba Tribunál tanba iha lei subsidiáriu bele ajuda fó solusaun.
Jornalista : Nelson de Sousa
Editór : Cancio Ximenes
