DILI, 05 dezembru 2024 (TATOLI)–Diretór Jerál Floresta, Kafé no Planta Insdustriál iha Ministériu Agrikultura, Pekuária, Peska no Floresta (MAPPF), Raimundo Mau, hateten Governu fó apoiu fundu entre $3.000 to’o $6.000 ba grupu agofloresta hamutuk 15 ba agrikultór sira iha munisipiu Dili, Liquiça no Manatuto.
Tuir responsável, kada grupu ita limita sira hetan fundu entre $3.000 to’o $6.000 depende ba iha proposta ne’ebé hetan avaliasaun.
Diretór ne’e esplika, kada grupu sei hetan fundu ne’e depende ba iha proposta ne’ebé hetan avaliasaun, hafoin halo akompañamentu ba sira liuhusi fó formasaun ba sira oinsá halo jestaun ba mikrofinansa, jestaun atividade no rekursu floresta.
“Ministériu mós apoiu fundu ba transferénsia atu sira bele iha biban hodi organiza sira-nia grupu ne’ebé eziste ona. Iha tinan ida-ne’e iha grupu 15 iha tinan 2025 no iha tinan kotuk grupu 10 ne’ebé sai pilotu ba implementasaun agrofloresta komunitária. Iha ne’ebá mós pratika agrikultura di’ak ho konservasaun floresta ninian hanesan kuida balada fuik, iha matéria ita prepara sira,” Raimundo Mau hateten ba Agência Tatoli hafoin Governu hal’ao enkontru parseiru dezenvolvimentu sira, iha Delta Nova, kinta ne’e.
Grupu agrofloresta hamutuk 15 ne’e hodi implementa sistema agrofloresta iha munisipiu sira iha tinan ne’e, maibé iha tinan kotuk Governu fó apoiu ba iha grupu agrofloresta sira iha munisipiu sira seluk.
Sistema agrofloresta ne’e Governu introdús iha tinan 20 ikus ne’e, maibé ida-ne’e sistema husi bei’ala sira-nian ne’ebé kuda ai-horis ba longu no kurtu tempu nian.
“Iha tinan tolu ikus, ita halo peskiza atu haree agrofloresta ne’ebé mak sustentável ka apropriadu ba ba zona klima Timor-Leste ninian. Iha kada zona sira-ne’e ai-horis saida mak merese di’ak-liu atu kuda iha ne’ebá. Liuhusi servisu floresta komunitária ninian, ita promove nafatin grupu sira husi suku hotu-hotu atu bele halo prátika agrofloresta ho di’ak tuir mekanizmu ne’ebé mak ita rekomenda,” nia dehan.
Jornalista : Jesuína Xavier
Editór : Cancio Ximenes
