DILI, 05 dezembru 2024 (TATOLI)–Ministru Agrikultura, Pekuária, Peska no Floresta (MAPPF), Marcos da Cruz, relata hahú husi janeiru to’dezembru 2024 ne’e Governu ezekuta Orsamentu Jerál Estadu (OJE) 2024 atinje ona 79% husi total OJE millaun $30.
Governante ne’e dehan, orsamentu sira-ne’e ministériu aloka tuir kategoria no nia ezekusaun mós tuir ida-ne’e, hanesan saláriu no vensimentu, bein servisu, kapitál minor no dezenvolvimentu no transferénsia públika.
“Ezekusaun agora ne’e besik 80% ona,” Governante ne’e hato’o ba jornalista sira iha hafoi hala’o enkontru ho parseiru dezenvolvimentu sira, iha Delta Nova, kinta ne’e.
Ministru ne’e hateten, orsamentu ne’e ezekuta ba iha programa prioridade sira hanesan 2024 nian iha área agrikutura, pekuária, peska no floresta.
Ministru ne’e garante katak iha fulan-dezembru ne’e hotu, ministériu bele ezekuta OJE 2024 to’o besik 90%.
“Ita espera katak iha tina ida-ne’e nai rohan, ita bele iha ezekusaun ida bele mais de 80%,” nia dehan.
Ministeriu Agrikultura, Pekuária, Peska no Floresta iha Orsamentu Jerál Estadu ne’ebé aprovadu ho montante millaun $25 ba tinan fiskál 2025.
Jornalista : Jesuína Xavier
Editór : Cancio Ximenes
