VIQUEQUE, 05 dezembru 2024 (TATOLI)-Vise Ministru Komersiu no Indústria (MKI), Augosto Junior Trindade, enkoraja Grupu Unidade moris di’ak kontinua prodús mina nuu hodi komepete iha merkadu lokál no nasionál.
“Ita hakarak motiva ita-nia grupu sira nafatin iha vokasaun ida hodi didika-an ba prodús mina nuu kontinua ba oin. Tanba ne’e, ami dezafiu ba grupu sira hakas-an, ita-nia rai riku ba produtu sira hanesan nuu, hodi prodús, prodús mina nuu kompete ba merkadu”, Augosto Junior Trindade, hateten hafoin ramata ensera formasaun ba grupu Unidade ba Moris di’ak, iha aldeia Fatuhadan, suku Uma Uain Kraik, postu Viqueque Vila, ohin.
Governante ne’e dehan, grupu sira halo produsaun mina nuu di’ak ekipa MKI sei akompaña grupu sira hodi moderniza produtu mina nuu no MKI buka merkadu ba sira.
“Ami mós sei halo ligasaun ba banku atu ajuda fó kréditu ba grupu sira. Ami fó dalan ba grupu sira-ne’e oinsa fasilita sira hodi rejista komérsial sai empreza”, governante ne’e promete.
Ba oin, Ministru ne’e dehan kontinua fasilita formasaun ba grupu sira hodi hala’o prosesamentu mina nuu no kapasita jestaun finansiamentu ba membru grupu sira.
“Tanba liuhusi formasaun atu diversifika ita-nia produtu lokál nuu, transfoma ba mina ho modernu hodi hasa’e valór ekonómia ida aas”, nia hateten.
Iha fatin hanesan, Prezidente Autoridade Munisípiu (PAM) Viqueque, Francisco Cruz Simões De Gonzaga Soares, husu ba Grupu Unidade ba Moris Di’ak uza koñesementu sira-ne’e hodi kontinua prodús mina nuu.
“Ita labele husu beibeik ba, maibé ho koñesementu ne’ebé iha koko implementa hanesan daudaun imi prodús ona mina nuu, labele para tenke prodús beibeik. Alende imi prodús imi mós tenke kuda nuu tanba ita agora nuu komesa menus ba bei-beik ne’ebé ita tenke kuda, labele hein de’it”, nia sujere.
Entertantu, Koordenadór Grupu Unidade ba Moris di’ak, Frei de Araújo, husu agradese ba MKI ne’ebé suporta ona Grupu liu formasaun no apoia ekipamentu ba prosesamentu mina nuu.
“Nune’e ba oin ami sei kontinua prodús mina nuu, ho koñesementu sira-ne’ebé ami hetan husi MKI no fasilidade makína ne’ebé MKI tulun ba ami prodús mina nuu hodi kompete ba merkadu sira iha Viqueque no nasionál”, nia realsa.
Daudaun ne’e, grupu hahú faan mina nuu ba komunidade sira iha Viqueque hanesan litru 2 ho folin $2,50 no litru 5 ho folin $8.00.
Enkuantu, Grupu Unidade ba Moris di’ak hahú hari’i iha tinan 2022 to’o agora ho totál na’in-34.
Iha enseramentu ne’e Vise MKI distribui ekipamentu produsaun mina-nuu nian hanesan makina dulas nuu ida, makína pres ida, balde, tasu no materiál sira seluk.
Jornalista : Vitorino Lopes da Costa
Editór : Florencio Miranda Ximenes
