VIQUEQUE, 05 dezembru 2024 (TATOLI)- Diretór Programa Nasionál Dezenvolvimentu Nasionál (PNDS) munisípiu Viqueque, Francisco Soares Varela, relata, finaliza ona reabilitasaun sede suku unidade 35 iha munisípiu Viqueque.
“Implementasaun reabilitasaun ba sede suku sira Viqueque ita hahú tinan 2021, 2022 no 2023 prosesu reabilitasaun sede 35 finanliza hotu ona, iha sede suku husi suku Maluro postu Viqueque Vila mak ita labele konstrui tanba lokaliza iha área dejignadu planta LNG Beaço, ne’ebé orsamentu ba fali kofre Estadu”,Francisco Soares Varela, hateten ba Tatoli, iha ninia knaar fatin, Beloi, ohin.
Francisco hatutan, prosesu reabilita PNDS fahe datoluk hanesan dahuluk postu Uatulari, postu Uatucarbau, faze daruak postu Ossú no faze datoluk mak postu Viqueque Vila no postu Lacluta ho totál sede suku 35.
Nune’e ba orsamentu RSS bazeia ba matadalan aloka ba reabilitasaun sede suku anteriór, maibé depende fila ba kada suku ida-idak, tanba suku balun uza osan reabilitasaun sira jere sira-nia orsamentu loke espasu ba medida uma, balu aumenta sala no haris-fatin.
“Iha sede suku husi postu Lacluta suku rua hanesan suku Ahic no suku Line maka prosesu tarde tanba kestaun estrada no modansa klimátika udan, maibé sede suku rua ne’e iha Setembru 2024 prosesu reablita hotu ona”, nia relata.
Sede suku sira reabilita ho medida 6×7, maibé autoridade suku sira halo jestaun ba orsamentu ba reabilita na’in sira halo espasaun sede suku kuaze maioria 7×10.
Tuir dadús alokasaun ba reabilitasaun kada sede suku ida aloka ho montante $12,000.00, husu totál sede suku unidade 35, gasta orsamentu $420,000.00.
Suku sira ne’ebé hetan reabilitasaun munisípiu Viqueque kompostu husi Postu Viqueque Vila suku 9, postu Ossu suku 10, postu Lacluta suku 4, postu Uatulari suku 6 no postu Lacluta suku 6.
Jornalista : Vitorino Lopes da Costa
Editór : Florencio Miranda Ximenes
