VIQUEQUE, 05 dezembru 2024 (TATOLI)-Sentru Solidaridade Sosiál (SSS) munisípiu Viqueque rejista ema ho difisiénsia (EhD) na’in-2.702 maka simu ona subsídiu.
“Dokumentu hanesan Billeti Identidade (BI), sertidaun moris sira-ne’e ami koordena ho parte relevante sira, atu fasilita ita-nia maluk difisiénte sira hodi asesu hotu subsídiu ne’ebé Governu kria”, Diretór SSS munisípiu Viqueque, Geraldo Guterres,hateten ba TATOLI, iha postu Viqueque Vila, ohin.
Alende ne’e nia dehan, SSS Viqueque sei esforsu halo sosializasaun ba xefe aldeia no xefe suku sira, iha área rurál hodi tau atensaun ba EhD ho dignu liuliu asesu ba subsídiu.
“Ami prontu atu apoiu rejistu ita-nia maluk EhD hodi asesu subsídiu hanesan sira nian maluk sira-ne’ebé asesu ona subsídiu referida”, nia hato’o.
Iha fatin ketak, Ofsiál Rais Hadomi Timor-Oan (RHTO), Natalino Pinto, rekoñse EhD Viqueque barak maka seidauk asesu ba subsídiu idozu tanba defisil atu halo dokumentu sira.
“Ami haree EhD iha munisípiu Viqueque pursentu 50% asesu ona subsídiu, ami RHTO sei halo kolaborasaun parte Notariadu hodi fó atendimentu ba maluk EhD sira liuliu dokumentu ne’ebé presiza hanesan BI, sertidaun moris no kartaun eleitorál, atu rejistu iha seguransa sosiál hodi hetan subsídiu”, nia promete.
Tuir dadús husi RHTO Viqueque ema ho difisiénsia rejista iha munisípiu Viqueque ho totál hamutuk 4.016, husi númeru 2.702 simu ona subsídiu no ema 1,314 seidauk simu subsídiu.
Jornalista : Vitorino Lopes da Costa
Editór : Florencio Miranda Ximenes
