Tinan 2025: MAPPF sei kuda ai-oan iha rai ektare 500
DILI, 05 dezembru 2024 (TATOLI)–Diretór Jerál Floresta, Kafé no Planta Insdustriál iha Ministériu Agrikultura, Pekuária, Peska no Floresta (MAFFP), Raimundo Mau, hateten Governu sei kuda ai-oan iha territóriu nasionál ho medida rai ektare 500 iha tinan 2025.
“Iha mós apoiu hosi ita-nia estensionista agrikultura nian iha suku sira hotu atu kontinua kontribui ba iha Governu nia alvu, atu iha tinan ida-ne’e pelumenus ita kuda hikas mínimu ai-oan iha rai mínimu ektare 500. Tanba, komparasaun ho degradasaun ne’ebé mak akontese tinan-tinan, ita lakon ai-laran ne’e liu mil ektare, maibé ita-nia kbit atu kuda hikas ne’e boot mak 500 ektare,” Nia hato’o ba Agência Tatoli hafoin hala’o enokontru entre Governu no parseiru dezenvolvimentu sira, iha Delta Nova, kinta ne’e.
Ai-horis sira-ne’ebé kuda mak hanesan ai-oan sira ho tipu konservasaun ai sira ba longu prazu hodi halo koleta no valór ekonómiku sira iha espesie ai-horis oioin hanesan sandalu ka ai-kameli.
Diretór relata, ai-horis sira-ne’ebé Governu prepara iha sentru viveiru sira hamutuk 3.000 ne’ebé sei kuda iha teritóriu hotu.
“Ba tinan ida ne’e 50% hosi ai oan sira ne’e prontu atu kuda iha tempu udan ida agora ne’e no 50% hosi ne’e ita hein to’o iha marsu ba leten ne’e ita bele kuda,” nia dehan.
Kada tinan, nia dehan, Governu lansa ba kuda ai-horis nasionál iha selebrasaun nasionál sandalu no florestál iha tinan oin iha loron 03 janeiru 2025.
“Ministru deside ona iha Nitibe Oé-Cusse. Ita sei kuda ai-kameli hektar lima iha ne’ebá no iha munisipiu sira seluk sei kuda mós ai-horis sira ne’e,” nia dehan.
Aleinde ne’e, nia konvida komunidade bele foti ai-oan sira iha sentru viveiru sira iha munisípiu, tanba ema agora iha munisípiu sira komesa foti daudaun no kuda maibé ofisiliza ne’e iha janeiru 2025.
Jornalista : Jesuína Xavier
Editór : Cancio Ximenes
