DILI, 06 novembru 2024 (TATOLI)- Prezidente Institututu Nasionál Seguransa Sosiál (INSS), Arlindo Pinto, partisipa forum Rejionál Seguransa Sosiál ba Ázia no Pasífiku, hanesan eventu seguransa sosiál ne’ebé boot no importante liu iha rejiaun ne’e.
Fórum ne’e hala’o iha Riyadh, Arábia Saudita, hahú iha loron 3 to’o 5 Dezembru 2024, tuir konvite husi Organizasaun Jerál ba Seguru Sosiál (GOSI).
Tuir nota ne’ebé Ajénsia TATOLI asesu katak, iha okaziaun ne’e, Prezidente INSS hasoru malu ho Sekertáriu Jerál no Vise-Sekretáriu Jerál ISSA nian hodi diskute kona-bá konvensaun adezaun seguransa sosiál Timor-Leste nian hodi sai membru permanente ISSA iha futuru.
“ISSA mós iha ona kompromisu hodi garante katak tinan 2025, Institu Seguransa Sosiál Timor-Leste bele sai ona membru permanente ISSA, tanba seguransa sosiál nu’udar asuntu importante hodi asegura sidadaun sira nia moris iha future,” refere nota ne’e.
Iha forum ne’ebé organiza husi Asosiasaun Internasionál Seguransa Sosiál (ISSA-Internasionál Social Security Association), ne’e halibur partisipante hamutuk 300-resin no reprezenta oportunidade markante ida ba fahe malu, aprendizajen no rede, hodi permite partisipante sira atu harii ligasaun ho líder no profisionál sira seluk iha sosiál seguransa ba líder sira no ema sira ne’ebé foti desizaun.
RSSF Ázia-Pasífiku dirije ba líder sira no jestór seniór sira husi instituisaun membru ISSA nian iha rejiaun.
Konvite sira mós sei hato’o ba ministru sira, polítiku sira, peritu sira no reprezentante sira husi organizasaun internasionál no rejionál sira, hanesan Organizasaun Internasionál Traballu nian (OIT), Banku Dezenvolvimentu Aziátiku (ADB), Komisaun Ekonómika no Sosiál Nasaun Unidas nian ba Ázia no Pasífiku ( ESCAP) no Asosiasaun Seguransa Sosiál ASEAN (ASSA).
Rezultadu pozitivu INSS tama ba Konvensaun ISSA
Rezultadu husi enkotru ne’e, Prezidente INSS no FRSS apresenta Planu Politika Seguransa Sosiál Timor-Leste ba menbru nasaun ISSA hodi ko’alia preparasaun INSS nian adere sai membru ISSA iha tinan 2025.
“Hahú Dezembru to’o Fevereiru atendimentu ba administrasaun no dokumentu hotu ba ISSA, iha Marsu no Abríl nia laran parte ISSA ho ILO sei konvida Ministra MSSI atu asina konvensaun ba adezaun membru ISSA, no iha Setembru sei halo serimónia ofisiál ida iha Forum Internasional iha Malázia no publikamente hato’o ba membru adesaun international husi nasaun 168 no 336 membru ISSA katak Timor-Leste Sai ona membru permanente ISSA, no karik ISSA mós sei konvida Primeiru Ministru hodi partisipa iha Forum international ne’e”.
Tema xave sira seguransa sosiál nian
Forum Rejionál Seguransa Sosiál ba Ázia no Pasífiku RSSF Ázia-Pasífiku ne’e aborda asuntu prioridade, tópiku oioin ba rejiaun. Estensaun kobertura ba grupu oioin iha setór formál no informál, nesesidade protesaun sosiál populasaun sira-nian ne’ebé evolui no papél lideransa instituisaun seguransa sosiál nian ba dezenvolvimentu sistema seguransa sosiál nian iha kontestu merkadu traballu kompleksu, dezenvolvimentu ekonómiku no demográfiku sei iha aspetu importante balu ne’ebé diskute ona.
Fórum ne’e foka mós kona-ba oinsá jestaun no prestasaun servisu sira transforma daudaun, no oinsá seguransa sosiál bele kontribui ba reziliénsia no sustentabilidade.
Organizasaun seguransa sosiál internasionál ka Asosiasaun Internasionál Seguransa Sosiál (ISSA) nia sede iha Jenebra, Suiza. Asosiasaun Internasionál Seguransa Sosiál (ISSA) maka organizasaun internasionál prinsipál iha mundu ba ajénsia sira seguransa sosiál nian, departamentu no ajénsia sira governu nian.
Prémiu prátika di’ak ISSA nian.
RSSF Ázia-Pasífiku sei hatudu serbisu inovativu no prátika di’ak sira husi parte instituisaun seguransa sosiál sira iha rejiaun. Prémiu Prátika Di’ak ISSA nian ne’ebé prestijiadu ba Ázia no Pasífiku no distinsaun espesiál foun ISSA nian ba inovasaun sei aprezenta iha serimónia espesiál ida durante eventu ne’e. Membru ISSA hotu-hotu iha rejiaun ne’e hetan enkorajamentu atu partisipa iha kompetisaun, ne’ebé sei loke iha tempu badak.
Fahe istória seguransa sosiál sira
Durante forum, membru no parseiru sira ISSA nian iha Ázia no Pasífiku hetan konvite hotu hodi fahe, liuhosi mídia mebru Nasaun sira, istória sira kona-ba sira nia serbisu no papél importante ne’ebé seguransa sosiál hala’o hodi harii sosiedade sira ne’ebé inkluzivu no reziliente.
Parte seluk, RSSF Ázia-Pasífiku loke de’it ba delegadu sira husi organizasaun membru ISSA nian husi rejiaun ida-ne’e no instituisaun sira ne’ebé hetan konvite. Laiha taxa rejistu ba membru ISSA sira. Partisipante sira sei responsabiliza ba sira nia kustu viajen no akomodasaun.
Reprezentante sira husi instituisaun sira ne’ebé la’ós membru husu atu kontaktu Sekretariadu Jerál ISSA nian ba termu no kondisaun sira partisipasaun nian.
TATOLI
