DILI, 05 dezembru 2024 (TATOLI) – Asosiasaun Nasionál Múzika Timor-Leste (ALMAMOR) realiza eventu dahuluk Timor-Leste Music Awards 2024 ba kategoria manan-na’in hamutuk 12.
“Ita orgullu tanba ita hamutuk iha ne’e atu halo eventu Timor-Leste Music Awards 2024, entaun figura sira-ne’e importante tanba hahú husi tempu difisíl to’o mai tempu dezenvolvimentu ida-ne’e, hodi ita hotu aseita hamutuk no buat di’ak ne’ebé mak halo ba ita-nia nasaun ida-ne’e”, Prezidente Almamor Filipus Nino Pereira, dehan iha nia diskursu iha salaun Multi-funsaun GMN Bebora, ohin.
Nia dehan, Timor-Leste organiza eventu Music Awards 2024 no espera katak tinan oin mantein. Maibé sura mós apoiu husi parte hotu.
“Ohin loron ita hotu nia kolaborasaun, fiar metin ba eventu ida-ne’e mak ita hakarak fó apresiasaun boot ba obra múzika hotu ne’ebé depende totalmente ba múzika, tanba iha eventu sira hanesan ne’e realiza tenke tinan-tinan, ho ondra no orgullu ba obra hotu ne’ebé mak ita-nia artisita hotu prodús”, nia esplika.
Nia haktuir, komunidade artista sira ne’e hahú husi 1975 to’o 2024 tanba ne’e fiar katak servisu ida ne’e tenke fó apresiasaun ba komunidade artista sira ne’ebé mak foin hahú hakat atu kontinua nafatin ba oin.
“Ita-nia komunidade artista sira ne’e ita fahe ba dekada hahú husi 1975 to’o 2024, tanba ita fiar katak ida-ne’e halo hotu tantu Governu, entaun ita fó apresiasaun ba komunidade artista sira ne’ebé mak foin primeira pasu, entaun ita hakarak kontinua dignifika obra artista sira, inklui mós ba parte múzika nian ne’ebé ita rekoñese katak ohin loron iha mundu múzika Timor-Leste dezenvolve aan daudaun ona, ita rekoñese ita-nia foinsa’e ohin loron lubuk ida, sira partisipa eventu internasionál ne’ebé ita espera katak eventu Timor-Leste music, ohin ne’e sai sasukat ida hodi ita hakak ba oin no ita hotu hamutuk hodi bele fó nafatin dignifika obra artista ida-ne’e no sira kontinua halo mundu múzika Timor-Leste ne’e ba oin”, nia relata.
Iha Fatin hanesan, Primeiru-Ministru, Kayrala Xanana Gusmão, hateten Timor Leste ukun aan tinan 22 resin, iha mundu múzika sei iha difikuldade maibé ita boot sira bele prova katak timoroan sira bainhira hakarak tau hamutuk hanoin halo buat ne’ebé mak di’ak ba sira-nia nasaun.
“Entaun halibur hamutuk ita boot sira iha ne’e, tanba hahú husi 1975-2024, ita boot sira atu fó sai talentu sira ne’ebé ita boot tau hamutuk, entaun kada tinan ita hala’o nafatin eventu ida-ne’e hodi bele dezenvolve ita-nia rain no hatudu sinál di’ak ba ita hotu”, Xanana esplika.
Xanana afirma, tempu badak sei inagura eskola múzika, atu Timor-Leste bele hatudu nafatin ninia talentu muzikál tanba ‘area ida-ne’e laos ema hotu bele tama no área ida-ne’e atu hatudu ba mundu katak timoroan mós iha talentu.
Timor-Leste Music Awards 2024 ba kategoria manan na’in hamutuk 12 mak vensedóra feto favóritu 2015-2024 Jessy Lopes simu taxa ho osan $1.000, Vensedór mane favóritu 2015-2024 ho kategoria Duo Grup Jange no Vanelada simu taxa ho osan $1.000. Vensedór mane favóritu 1975-1994 mak Anito Matos ne’ebé simu taxa ho osan $1.000. Vensedór ba mane favóritu 1975_2014 mak Jenik Travolta simu taxa ho osan $1.000, Vensedór mane favóritu 2015-2024 mak Crimson simu taxa ho osan $1.000.
Vensedór favóritu banda múzika 1995-2014 husi Anar Band simu taxa ho osan $1.000, vensedór favóritu banda 2015-2024 husi Cocoustic simu taxa ho osan $1.000, Vensedór album favóritu husi Crimson simu taxa ho osan $1.000, vensedór hakerek nain husi Ganjo simu taxa ho osan $1.000, Artista favóritu husi Jange simu taxa ho osan $1.000, vensedór múzika favóritu husi Criimson simu taxa ho osan $1.000 no Vensedór múzika video favóritu husi Quatro Cores ne’ebé simu taxa ho osan $1.000.
Komisaun organizadora fahe mós sertifikadu apresiasaun ba artista tuan husi Lahane group, artista tuan husi Cinco de Oriente, artista tuan matebian Siko Maulohi ne’ebé reprezenta husi nia oan feto.
Jornalista : Felicidade Ximene
Editór : Zezito Silva
