DILI, 06 dezembru 2024 (TATOLI) – Banku Rakyat Indonézia (BRI), ohin halo lansamentu ba eskritóriu BRI nian iha Colmera, hodi fó atendimentu ba kliente komunidade Timor-Leste (TL) tuir padraun ninian.
“Ohin ami halo lansamentu Banku BRI iha TL, iha ne’e iha eskritóriu ne’e ami foka atividade ba tranzasaun servisu ba kliente komunitáriu sira iha Timor-Leste, ida-ne’e hanesan pasu dahuluk, klaru, ami iha komitmentu atu kontinua dezenvolve, hadi’a no asegura atendimentu ba komunidade Timor-Leste nia kliente sira iha liña ho padraun ne’ebé di’ak liu hosi ami-nia atendimentu”, Jerente Jerál BRI Timor Leste, Roby Firmansjah Sastmadja, dehan ba jornalista sira iha Banku BRI Colmera Dili, ohin.
Nia hateten, aleinde iha Colmera, Banku BRI nia eskritóriu sira iha Audian, Fatuhada, Hudi Laran no ikus liu sei harii edifísiu eskritóriu ida iha Oe-Cusse.
“Ami sei loke edifísiu BRI ida iha Oecusse, ne’ebé oras ne’e daudaun ne’e sei prepara no iha tinan oin mai, ami sei koko atu hala’o konstrusaun atu nune’e povu iha ne’eba mós bele hetan atendimentu ho di’ak”, nia esplika.
Nia afirma katak, BRI mós sei hakas aan ba servisu dijitál sira, iha ne’ebé antes ne’e lansa ona produtu dijitál oioin iha TL, hanesan Internet Banking, destinadu ba emprezáriu sira, kartaun Brizzi/eletrónika ne’ebé uza ba kompras no pagamentu sira no BRI bele hala’o tranzasaun uza telemovel.
Iha fatin hanesan, Embaixadór Repúblika Indonézia iha Timor-Leste, Okto Dorinus Manik, hateten dezenvolvimentu eskritóriu BRI iha Timor-Leste bele hametin liután relasaun kooperativa entre Indonézia ho Timor-Leste.
“BRI TL. “Soft launching ba reparasaun no renovasaun edifísiu eskritóriu BRI nian iha Dili, no ida-ne’e parte ida husi aprosimasaun kualidade servisu Banku BRI nian”, Embaixadór Indonezia afirma.
Nia informa, BRI kontinua kompromete ba dezenvolvimentu TL, liuliu iha setór bankaria, nune’e ida-ne’e aliña ho komitmentu Governu Indonézia nian atu sempre kontribui ba dezenvolvimentu TL, liuliu iha setór finanseiru.
“Hadi’a infraestrutura edifísiu nian maka parte ida hosi hadi’a servisu sira”, Okto subliña.
Adjuntu Governadór Banku Sentrál Timor-Leste (BCTL), Rafael Borges, mós rekoñese katak Banku BRI mós fó apoiu ba kliente sira husi komunidade TL.
“Desde BRI fó ona servisu, apoiu barak ona ba komunidade, liuliu fó kréditu ba ami-nia funsionáriu sira atu hadi’a ekonomia família nian no iha mós BRI nia ramu haat, hodi dezenvolve eskritóriu BRI ita bele fó servisu ba povu TL”, Rafael dehan.
Tuir nia, dezenvolvimentu eskritóriu BRI iha Timor-Leste bele sai hanesan pasu di’ak liu ba prosesu dezenvolvimentu TL no hein katak BRI mós kontinua fó apoiu ba TL nia adezaun ba ASEAN.
Jornalista : Felicidade Ximenes
Editór : Zezito Silva
