DILI, 06 dezembru 2024 (TATOLI) – Prezidente Repúblika, José Ramos-Horta, husu ba ema hotu atu hakru’uk no fó onra ba eroi sira ne’ebé mate iha loron 7 Dezembru 1975, bainhira Indonézia invade Timor-Leste.
“Ita hotu hakruk ba eroi, vitima sira ne’ebé mate iha loron 7 de Dezembru, Nicolau Lobato nia kaben mós mate iha momentu ne’ebá, timoroan lubuk ida mak mate iha tempu ne’ebá, Roger Is, nia ha’u nia belun boot nia mós mate iha tempu ne’ebá, Roger ne’e nia ami na’in-rua mak funda East Timor News Agency (ETNA) iha outubru 1975,” Ramos-Horta hateten iha edifisiu Ministériu Negósiu Estranjeiru no Kooperasaun (MNEK) Dili, sesta ne’e.
Xefe Estadu relembra, husi 7 Dezembru mak loke dalan ba funu entre Timor-Leste ho Indonézia hodi lori sofrimentu boot ba povu Timor-Leste, ho nune’e ema hotu tenke fó onra ba eroi sira.
Ho loron nasionál 7 Dezembru, Ramos-Horta alerta ba joven sira atu kria nafatin pás iha nasaun ne’e hodi kontribui ba dezenvolvimentu nasaun nian.
“Joven sira ita tenke kria pás iha nasaun ne’e, ho luta imi nia inan-aman sira nian mak fó vitória ba ita agora goja ona ne’e, agora oportunidade atu eskola tanba Governu fó eskola gratuita, tenke aproveita ho di’ak, sira ne’ebé finaliza ona kursu lisensiatura, labele tu’ur nonok kontinua buka oportunidade atu kontinua tan eskola bainhira iha oportunidade tanba nasaun ne’e iha joven sira nia liman,” Xefe Estadu sujere.
Jornalista: Hortencio Sanchez
Editór: Florencio Miranda Ximenes
