LIQUIÇA, 07 dezembru 2024 (TATOLI) – Vise-Primeiru-Ministru, Ministru Kordenadór Asuntu Sosiál no Ministru Dezenvolvimentu Rurál Abitasaun Komunitaria, Mariano Assanami Sabino, hateten, programa halo uma dignu ba povu finaliza ona iha faze konkursu publiku no haka’at ona ba implementasaun.
“Programa halo uma dignu ne’e nia konkursu publiku finaliza ona, agora tama ona implementasaun, iha tinan 2024 uma ne’e tarde uitoan tanba nia prosesu ne’e mak naruk, ita sei lori ba iha Ministeriu Obra Públiku, ADN, koordenasaun ho fali Terras Propriedade, koordena ho uma-na’in ne’ebé mak atu hela ne’e agora buat hotu loos ona, iha tinan 2025 ne’e tama ona ba faze konstrusaun tanba dezeñu hotu ona no hetan ona aprovasaun,” Vise PM Assanami hateten ba jornalista sira iha Mota-Ulun Liquiça, sabádu ne’e.
Governante ne’e dehan prosesu ba programa uma dignu ne’e ba oin sei sai boot bele muda ba Fundu Infrastrutura, nune’e bele hamosu Bairru Foun tanba la’ós ko’alia uma de’it maibé ko’alia mós ema iha laran bele moris ho saudavel, hasa’e rendimentu no muda mentalidade atu moris hamutuk iha bairru foun ida.
“Dalabarak parte balun kestiona ba uma ne’ebé ita halo tenke selu fali, tanba ita halo uma fó ba ema sira ne’e tenke hadi’a sira nia ekonomia, ita la’ós halo uma ne’e fó ba nia atu ba buka moris fali iha fatin seluk, maibé nia buka moris rasik iha fatin ne’ebé nia hela Governu sei buka meiu oinsa kria servisu iha ne’ebá, se uma na’in ne’e nia rendimentu kada fulan liu ona husi $500, foin mak nia bele selu taxa kada fulan $50, bainhira nia rendimentu la to’o $500 nia sei hela gratuita,ida ne’e mak bolu dignu ne’e, signifika nia uma rasik la’ós Estadu mak fó ba nia tanba nia selu entaun ninian rasik,” nia hateten.
Tuir planu ne’ebé iha ona, iha tinan 2024 sei harii uluk uma hamutuk 90 ho total ne’e uma hamutuk 25 iha Tunu-Bibi-Maliana, 25 iha Fatuberliu, 25 iha Natarbora no 15 iha Muapitini Lautem.
Uma dignu ne’ebé Governu atu halo ba komunidade sira ho nia medida 9×12, iha ne’ebé kada uma ida sei gasta orsamentu hamutuk $45.000. Tanba ne’e total osan ne’ebé sei gasta ba uma 90 iha faze da-uluk ne’e hamutuk $4.050.00.
Jornalista: Hortencio Sanchez
Editór: Florencio Miranda Ximenes
