Dom Virgílio Kardeál: “Hatán “Sim!” ba Maromak katak entrega aan sein rezerva”
DILI, 07 dezembru 2024 (TATOLI)–Arsebispu Arkedioseze Metropolitana Dili, Dom Vírgilio Kardeál do Carmo da Silva, hateten ema ida hatán “sim!” ba Maromak katak entrega aan sein rezerva ba Maromak ne’ebé komptempla Nossa Senhora nia liafuan “atan oan mak ne’e, halo tuir ita nia hakarak”, bainhira akontese anunsiasaun anju Gabriel hodi kous kosok oan.
Kardeál hato’o mensajen ne’e iha misa selebrasaun loron padroeira Parokia Imaculada Conceição, renovasaun vida konsagrada relijiosa no relijioza sira no ordenasaun saserdotál ba diákonu na’in-haat (4) hanesan Joanico Adeliade Ximenes Almeida, José da Silva dos Santos, José de Araújo da Costa no Mateus de Jesus, sai Nailulik iha igreja Katedrál Dili.
Dom Virgílio Kardeál ne’e hateten, loron Imaculada Conceição hanesan Mahein Arkedioseze Dili no padroeira Timor nian ne’ebé loloos selebra iha 08 dezembru, maibé tanba iha loron domingu entaun selebra iha sábadu ohin tanba loron ohin mós loron asaun degrasa.
“Mai ita aprende hosi virjen Maria, Na’in atan oan mak ne’e halo tuir ita liafuan ba, sai Maromak ninian. Ohin mós husu ba imi na’in-haat, ha’u mak ne’e, Nai. Hatudu imi-nia prontidaun, imi-nia jenerozidade ba Maromak atu entrega aan ba Maromak imi nia aan tomak sein rezerva. Ita la promete tinan 25 lima de’it ka ordenasaun la’ós promesa kontratu nian ka kondisaun ruma, lae, ida-ne’e ba moris tomak sein rezerva,” Kardeal hato’o iha ninia omilia.
Entrega aan totál ka sein rezerva ne’e, Maromak sei iha bensaun no fó tulun nafatin entaun presiza laran metin ba Maromak no matan moris atu labele monu ba Adão nia liafuan katak mo’e hasoru Maromak.
Mensajen sira-ne’e, Dom Virgílio Kardeál foti bazeia ba leitura Jenesis no evanjellu Lucas nian kona-ba anúnsia anju nia ba Virjen Maria hodi kous Meniñu Jesus kosok oan.
“Hatán ‘Sim!’ ba Maromak hanesan konvite Nossa Senhora nian atu la’o hamutuk no aprende no renova ita fiar,” nia dehan.
Amululik katak ida ne’ebé nakloke nafatin ba Maromak atu rona no la’o hamutuk ho maluk saserdote, konsellu pastoral no bispu sira nu’udar igreja.
Tuir nia, tama tinan jubileu nian amululik sira sai esperansa ba nia povu sira no sinál esperansa fiar nian ba foinsa’e sira.
Bispu Dili ne’e rekorda fila-fali kona-ba liafuan amu Papa Francisco ninia mensajen kona-ba ai-kameli nia morin, ida-ne’e amu Papa hakarak hateten ba Nailulik sira mina morin ba Kristu oinsá mak atu kuida evanjellu nia morin no hada’et ba sarani sira.
“Hanesan evanjellu sai mina morin ne’ebé rega ba sarani sira. ‘Guardar o perfume e difundir o perfume, hatene rai no fahe, labele tau ba ninia aan,” nia hateten.
Arsebispu husu ba padre foun sira atu sai instrumentu bensaun ninian ba sarani sira, buka sai laran sadia no konsola nafatin no sinál miserikordia Maromak ninian ba nia povu, hanesan amu Papa hateten.
Nia kongratula no fó ksolok loron ohin ne’ebé amu sira saran aan ba Maromak ne’ebé entrega aan sein rezerva hodi serbí uma kreda.
Reprezentante padre foun sira, Pe. Joanico Adeliade Ximenes Almeida hato’o mós sinsera gratidaun ba inan-aman, ba formadór sira no sarani sira-ne’ebé ajuda sira liuhosi orasaun, formasaun estudu no valór fiar nian iha sira-nia kamiñada moris ba saserdósiu.
“Ami agaradese ba imi hotu no deskulpa mós ba buat naksalak konsiente no inkosiente, buat ne’ebé imi halo ba ami Maromak fó grasa ba imi, laiha buat ida ne’ebé mak atu fó maibé hanoin nafatin imi iha ami-nia orasaun,” nia dehan.
Nia hateten, liuhosi ema barak nia kontribuisaun direta no indireta ajuda sira hotu hodi hala’o sira-nia moris hodi entrega aan ba Maromak no husu nafatin ema hotu nia orasaun iha sira-nia moris loro-loron.
Padre foun na’in-haat ne’ebé simu ordenasaun mak hanesan hanesan Padre Joanico Adelaide Ximenes Almeida moris ia Dili, iha 20 Jullu 1988, oan hosi Tomás Adelaide Pereira no Lorença Correia Ximenes husi Baucau, hanesan oan dahuluk husi maun alin na’in-hitu.
Padre José da Silva dos Santos moris iha Letefoho, iha loron 22 jullu 1991, oan husi Afonso da Silva no Lúcia de Carvalho husi Letefoho.
Padre José de Araújo da Costa moris iha Maubisse Aitutu iha loron 05 setembru 1990, oan hosi Adelino da Costa no Adelina de Araújo hosi Maubisse, hanesan oan daruak husi maun-alin 14.
Padre Mateus de Jesus moris iha Poetete-Ermera iha loron 12 setembru 1990, oan husi José Soares no Júlia de Jesus hosi Poete-Ermera, hanesan oan dalima hosi mau-nalin 11.
Jornalista : Jesuína Xavier
Editór : Cancio Ximenes
