DILI, 07 dezembru 2024 (TATOLI)–Ministru Transporte no Komunikasaun (MTK), Miguel Marques Manetelu, hateten Governu kontinua prosesu sertifikasaun kampu aviasaun iha munisipiu Covalima no Rejiaun Administrativa Espesiál Oé-Cusse Ambeno (RAEOA) ba iha Organizasaun Internasionál Aviasaun Sivil (ICAO, sigla inglés) sai aeroporto internasionál.
“Agora, ida Suai, maske pista kampu aero portu ne’e badak, maibé ita kontinua halo prosesu sertifikasaun aeroportu internasionál no prosesu la’o hela, tanba aban bainrua dezenvolvimentu tasi mane ne’e la’o. Aviaun lojistika husi Darwin, la’ós aviaun boot, nia bele ba tun iha ne’ebá. Se ita la sertifika hanesan kampu aviasaun internasionál aviaun husi Darwin labele tun iha ne’ebá,” Governante ne’e hateten ba Agência TATOLI, hafoin partisipa lansamentu livru ”The Sky is Ours” iha salaun Ministériu Negósiu Estranjeiru no Kooperasaun (MNEK), Avenida de Portugál, Pantai Kelapa, kinta ne’e.
Nia haktuir, dalaruma mai elikóptru de’it ka aviaun kiik de’it, tanba ne’e tenke sertifika maibé agora prosesu la’o hela, tanba empreza Austrália nian ida iha ne’ebá.
“Ita sei hadi’a buat balun atu prienxe rekezitu ICAO,” nia dehan.
Nia relata, prosesu ba aeroportu RAEOA nian sei hein hela hodi kontinua diskusaun ho Governu Indonézia, tanba iha ne’ebá sei iha mudansa estrutura Governu foun.
“Prosesu diskusaun ba aeroportu Suai la’o hela, agora Oé-Cusse ne’e mak ita hanesan suspende (terhambat) uitoan, ho mudansa estrutura iha MTK Indonézia nian. Tanba, Governu foun no estrutura foun, diskusaun la’o hela tanba espasu aero iha Oé-Cusse ne’e aviaun sa’e bosok tama Indonézia ona. Ne’ebé, kuandu ita sertifika sai aeroporto internasionál, se aban bainrua aviaun sira husi li’ur mai, nia atu tun ne’e tenke hetan autorizasaun husi Indonézia tanba espasu aero ne’e Indonézia nian,” ministru dehan.
Tanba ne’e, nia dehan, iha enkontru ida iha Bali iha setembru nia laran ho ministru sesante iha diskusaun ida-ne’ebé hakarak atu ekipa MTK Indonézia ajuda iha dezeñu espasu aero nian.
“Ami ko’alia hela atu sira-nia ekipa mai ajuda hamutuk ho ita nia ANATL, sira mak atu halo dezeñu ba espasu aero nian, prosesu la’o hela. Agora, sei para hela tanba mundansa estrutura iha ne’ebá. Ida Oé-Cusse ne’e para hela,” nia dehan.
Jornalista : Jesuína Xavier
Editór : Cancio Ximenes
