“Ita-nia luta ba independénsia nunka bele para”
DILI, 07 dezembru 2024 (TATOLI)–Arsebispu Arkidioseze Metropolitana Dili, Dom Virgílio Kardeál do Carmo da Silva, hateten ko’alia kona-ba libertasaun ne’e ko’alia kona-ba invazaun katak ema ne’ebé mai hanehan no hakloot timoroan nia liberdade liberdade.
“Ita hanoin hikas ba loron invazaun, entaun ita nia luta ba independensia nunka bele para. Hotu-hotu tenke serbisu makaas nafatin. Hotu-hotu esforsu konbate luta hasoru forma oioin ne’ebé sai obstakulu ba ita-nia liberdade no independénsia no moris nu’udar timoroan,” Dom Virgílio hato’o lia hirak ne’e relasiona ho selebrasaun loron invazaun 07 dezembru, sábadu ne’e.
Tuir nia, hanesan forma oioin sira-ne’ebé mak mai entaun timoroan dezde uluk ona lakohi ema atu hanehan, maibé livre husi buat hotu ne’ebé mak mai hanehan timoroan hanesan sai obstakulu ba valor moris nian.
Nia dehan, hanoin fila-fali amu Papa Francisco nia liafuan ko’alia kona-ba lafaek, timoroan sira mós tenke kuidadu ba buat sira ne’e hotu ne’ebé sai obstakulu atu hamenus Timor-Leste nia valór kulturál.
“Kultura Timor ninian mak ita fiar rasik nu’udar timoroan no sarani. Ha’u hanoin, ita tenke kaer metin espiritu luta ne’e nunka bele para, lori ita la’o maske neineik, ita la’o nafatin hodi lori dezenvolvimentu pás ba ema hotu. Ne’e katak hotu-hotu, ferik katuas (no foinsa’e) hakaas aan duni atu liberta nia aan husi forma violénsia oioin hanesan tuda malu no duni malu iha fatin-fatin,” nia dehan.
Tanba ne’e, agora tama ona ba tempou adventu nian no besik tama festa Natál, fó hanoin ba ema hotu hatene respeita nia aan tanba ukun aan hodi hasoru buat aat ne’ebé estraga unidade iha familia no aldeia laran, suku no nasaun.
“Forma ida-ne’ebé ita sarani hotu tenke luta libertta ita-nia aan,” bispu Diosezze Dili ne’e hateten.
Jornalista : Jesuína Xavier
Editór : Cancio Ximenes
