Atambua, 08 dezembru (TATOLI) – Vise Primeiru Ministru no Ministru koordenadór asuntu Dezenvolvimentu Rurál, Mariano Asanami Sabino, halo abertura ba eventu Timor Island Adventure iha Suku Dirun, Postu Administrativu Weluli, Munisípiu Belu.
”Objetivu husi eventu Timor Island ne’e atu promove illa timor, área turizmu no kulturál ne’ebé mak ita iha, entaun ita promove fila fali no liga mós ba maun alin ne’ebé uluk iha, entaun ida-ne’e mak ita halo eventu ne’e hodi nafatin iha relasaun ne’ebé di’ak ba malu”, Mariano Asanami Sabino informa iha nia diskursu iha fulan-fehan Atambua, ohin.
Assanami dehan, atividade ba eventu Timor Island adventure ne’e atu hametin relasaun entre timor ho Indonézia no atu promove Turizmu desportu internasionál no hametin ho rejionál sira.
‘’H’au husu ba siklista sira nafatin hatudu esforsu sira tanba ita boot sira mak reprezenta illa timor hodi promove ba mundu liuhusi atividade sira ne’e. Ha’u-nia apresiasaun ba timoroan sira ne’ebé mak hola parte iha eventu ida-ne’e nafatin, hodi hatudu espiritu atenbrani hodi lori ita-nia nasaun ba oin”, nia esplika.
Nia esplika, eventu ida-ne’e laos to’o iha ne’e deit, maibé sei kontinua halo tanba ne’e agradese ba fatin ida-ne’e hodi halibur eventu iha área ida-ne’e.
Iha fatin hanesan, Reprezentante Adido husi KBRI iha Timor Leste, Don Gaspar da Costa, hateten Liuhusi eventu ida-ne’e laos ba atu buka manan, maibé atu hametin relasaun família entre belu ho Timor-Leste.
“Fronteira la signifika atu haketak ita, maibé eventu ne’e hanesan desportu ida atu hametin ita-nia relasaun”, Don Gaspar da Costa afirma.
Nia relata, liuhusi atividade Timor island adventure ida-ne’e atu hametin relasaun domin ba malu.
Vise Administador Belu, Aloysius Haleseresz agradese ba Governu Timor Leste hodi bele realiza korida bisikleta iha Belu.
”Liu husi atividade eventu ida-ne’e ha’u orgullu tebes tanba atu hametin relasaun ho maluk timor-Leste”, Aloysius esplika.
Koordenadór eventu Timor Island Adventure, Joel Maria Pereira informa siklista sira ne’ebé mak tuir eventu ne’e hamutuk 49 ne’ebé, mai husi nasaun Indonézia, Austrália no Timor-Leste.
“Sklista sira ne’e lolos hamutuk 52, maibé nain tolu la tuir, entaun agora hamutuk 49 ne’ebé mak atu tuir eventu ida-ne’e”, Joel Maria Pereira haktuir.
Nia dehan, husi etapa dahuluk husi Fulan Fehan ba Betun no kontinua ba pantai Lodik Malaka ho distansia 83,6km no etapa daruak husi Malaka ba Suai Loro Covalima ho distansia 109km, etapa datoluk hahú husi Suai Loro ba Manufahi Luak ho distánsia 72,67km, etapa dahaat husi Manufahi ba Aubeon Natarbora Manatuto ho distánsia 67,2km
Etapa Dalima, hahú husi Natarbora Manatuto ba Loihunu Ossu Viqueque ho distánsia 67,6km no etapa finál husi Viqueque ba Baucau ho distánsia 61,3 km.
Iha eventu Timor Island adventure ne’ebé halao iha Fulan Fehan Atambua partisipa husi Vise Primeiru Ministru no Ministru Koordenadór asuntu Rurál, Xefe Estadu Maiór Jenerál Falintil Forsa Defeza Timor- Leste, Sekretáriu Estadu Protesaun Sivil, Rerezentante Administradór Belu Atambua, Autoridade Munisípiu Covalima, Superentidente Munisípiu Covalima no entidade relevante sira inklui komunidade husi Fulan Fehan.
Jornalista : Felicidade Ximenes
Editór : Zezito Silva
