VIQUEQUE, 07 dezembru 2024 (TATOLI)-Pré-Eskolár Halimar Oportunidade Parseiru Exelente (HOPE) komunidade área Belula, suku Macadique, postu Uatulari, munisípiu Viqueque fó graduasaun ba estudante na’in-7.
Reprezentante Diretór Edukasaun munisípiu Viqueque, Domingos Gaspar, hateten, Pré-eskolár komunidade Macadique existe kuaze tinan tolu ona, hodi kontribui edukasaun hanorin komunidade sira-nia oan husi idade ki’ik sira.
“Agradese ba manorin sira-ne’ebé didika sira-nia an hanoin komunidade sira-nia oan, husi la hatene lee no hakerek, manorin sira esforsu to’o ita-nia oan sira hatene lee no hakarek. Tanba ne’e, ha’u husu parabéns ba manorin sira tanba hanorin estudante pré-eskolár la’ós fasil, labarik mesak idade ki’ik, maibé sira konsege lori to’o iha faze graduasaun ida-ne’e”, Dominigos Gaspar, hateten iha serimónia graduasaun pré-eskolár Macadique, ohin.
Nia dehan, Pré-eskolár Macadique ho profesór na’in-rua ne’ebé durante ne’e hanorin espiritu voluntáriu maka hanorin estudante sira durante tinan tolu nian laran.
“Iha kritéria ema ne’ebé sai manorin tenke baisarelatu, lisensiatura maka bele hanorin, maibé ita-nia profersor na’in rua ne’ebé dadauk hanorin iha pré-eskolár ida-ne’e ramata sekundáriu, durante ne’e sira oferese sira-nia an tomak hanorin ita-nia oan. Nune’e, ba oin maka bolsa kandidatu profesór Governu rekruta ami sei rekomenda sira na’in rua tanba sira oferese ona sira-nia sakrifisiu hodi hanorin ita-nia oan sira”. Nia hato’o.
Iha biban ne’e, Reprezente Fundasaun HOPE akademia Nasionál, Samelia Fatima de Araújo, haktuir, edukasaun sai filiár importante ba oan sira tanba liuhusi edukasaun oan sira bele dezenvolve moris tomak.
“Hanesan ita-nia oan sira pré-eskolár sira presiza liu edukasaun hodi dezenvolve sira-nia pensamentu sosiál no emosionál sira. Tanba iha prosesu apredizajén manorin sira oferese atividade barak ba estudante pré-eskolár”, Samelia haktuit.
Tanba ne’e, nia fó korajen ba inan-amán sira lori oan sira asesu ba aprende tanba prosesu edukasaun inisiu maka pré-eskolár hafoin kontinua ensinu sira.
“Dala dala barak ema hanoin pré-eskolár ema hanoin ita-nia oan sira ba halimar. Maibé ha’u hakarak dehan katak liuhusi pré-eskolár mak atu dezenvolve ita-nia oan no prepara sira sai futuru ida ne’ebé liután. Pré-eskolár maka sai fundasi ida forte tebes. Tanba ne’e, fundasaun HOPE establese pré-eskolár komunidade ida-ne’e hodi komunidade sira-nia oan asesu”. Nia realsa.
Iha fatin hanesn, Koordenadóra Pré-eskolár, Macadique, Felisidade da Silva Fernandes, relata, ba tinan anu letivu 2024 estudante na’in-15 ne’ebé fahe klase rua A no B.
“Ohin, gradua ne’e klase B maka gradua hamutuk na’in hitu ne’ebé ami avalia katak sira hatene ona lee, hakerek no sira idade neen ba leten. Entaun liuhusi graduasaun ne’e sira lori sertifikadu ne’ebé sira hetan lori ba rejistu iha ensinu báziku sira durante estudante aprende”, nia realsa.
Oportunidade ne’e nia dehan, durante ne’e profesór sira hanorin estudante pré-eskolár okupa komunidade sira nian uma hodi uza ba hanorin estudante sira.
“Tan ne’e, ha’u hakarak husu ba Governu tulun ami konstroi ami-nia edifísiu ida hodi ami bele uza hanorin komunidade sira-nia oan oha baze”. Nia sujere.
Iha okaziaun ne’e reprezentante inan aman, Fernando da Silva, husu agradese ba profesór sira-ne’ebé durante didika sira-nia tempu tomak hanorin komunidade sira-nia oan ho volumtáriu hodi koñese alfabetu sira.
‘Durante ne’e, ami inan-amán sira preokupa toos, natar no lia, ami la preokupa lori ami-nia oan sira bá eskola. Ohin hatudu ba ami durante tinan ida ami husi hela ba profesór hanorin no ninia rezultadu mak sira tau batina no hatudu ba ami inan aman sira hatene lee no koñese alfabetu sira. Tanba ne’e ami inan aman sira hakarak husu parabéns ba profesór sira”. Nia hato’o.
Jornalista : Vitorino Lopes da Costa
Editór : Florencio Miranda Ximenes
