VIQUEQUE, 08 dezembru 2024 (TATOLI)- Veteranu no família martir libertasaun nasionál husi suku Macadique, postu administrativu Uatulari, munisípiu Viqueque kontinua rekolla restu mortál sira iha foho Matebian.
Tuir Sesaun identifikasaun restu mortál, Veteranu Uatulari, António Gusmão “Mau-Sara”, hateten, prosesu rekolla restu mortáL ne’ebé realiza iha postu Uatulari agora tama faze iha dahaat no faze ida-ne’e rekolla vida sivil ne’ebé mate iha foho Matebian tutun.
“Ohin, ami hahú fali rekolla restu mortál ba faze dahaat ba ita-nia saudozu sira-nia hanesan ema sivil no militár balun ne’ebé rui namkari iha foho Matebian, prosesu ne’e, ami rekolla hotu hodi tau iha fatin ne’ebé prepara iha sentru sira-ne’ebé komisaun eskolla”,António Gusmão “Mau-Sara”, ba TATOLI,I.P, suku Macadique, ohin.
Prosesu rekolla restu mortál ne’e inisiativa husi família martir sira, veteranu no komisaun rekolla restu mortál postu Uatulari konkorda hamutuk hodi buka inan-amán no maluk sira-ne’ebé hetan trorturasaun, baku mate, kilat musan kona no ema oho mate tanba hakarak ukun rasik-an.
“Realiza programa rekolla restu mortál ne’e hetan apoiu fundu husi família martir ida ne’ebé liga saudozu sira. ami buka família sira ruin ne’ebé mate ba rai ida-ne’e”.
Rekolla restu mortál ba faze dahaat husi suku Macadique na’in-132, família no veteranu sira hetan uluk na’in-38 ruin iha foho Matebian.
“Nune’e, ami sei kontinua buka martir sira-nia restu mortál hotu, sei rai iha suku Macadique, hafoin kontinua lori ba rai iha Uma-Mahon postu Uatulari’, nia afirma.
Konstroi lalais Jardín eroi iha Postu Uatulari
Iha fatin hanesan, Reprezentante família Martir sira, José Pinto Soares “Kalulik”, haktuir, tempu nia-lakon família tanba kauza husi militar Indonézia, kliat musan no mate ba hamlaha sira mate, sira-nia ruin naklekar iha foho matebian tanba ne’e família hamutuk ho veteranu sira deside rekolla.
“Hafoin, ami rekolla hotu mak sei entrega ba Estadu hodi halo’ot iha fatin dignu. Iha faze dahaat ne’e ha’u-nia alin rasik na’in ida mate hanesan vida sivil ne’ebé mate iha foho Matebian”, nia akresenta.
Nune’e nia husu, Nunu Governu atu aselera konstrusaun jardín eroi ba postu Uatulari nian ne’ebé konstrui ona iha suku Uma-Uain Leten ne’ebé to’o agora konstrusaun seidauk ramata.
“Tanba ne’e, ami família martir hakarak rekomenda ba Governu hodi aselera konstrusaun, atu halo’ot restu mortál konstrusaun jardín eroi ba postu Uatulari ne’ebé daudaun ne’e rai iha uma mahon Uatulari”, nia sujere.
Tuir husi komisaun rekolla postu Uatulari ba faze dahaat totál na’in-339, husi suku Macadique hahú rekolla restu mortal na’in-132, durante loron rua konsege rekolla ona restu mortál na’in-38
Tuir planu husi komisaun rekolla restu mortal iha loron 10 sei rai restu mortal iha sentru tolu ne’ebé komisaun eskolla maka hanesan sentru Macadique, sentru Edumumu no sentru Uatulari Antiga. Iha loron 16 fulan Dezenbru restu mortal hirak ne’e sei entrega ba uma mahon Uatulari.
Iha serimónia rekolla restu mortál ne’e hetan partisipa husi vetetanu, família martir no autotidade lokál sira iha postu administrativu Uatulari.
Jornalista : Vitorino Lopes da Costa
Editór : Florencio Miranda Ximenes
