DILI, 09 dezembru 2024 (TATOLI)—Deputadu CNRT, Martins, husu Ministériu Edukasaun (ME) atu estabelese ensinu báziku paralelu ida iha Pala, suku Lauhata, postu administrativu Bazartete, munisípiu Liquiça.
“Ba Ministériu Edukasaun hato’o ba diretór edukasaun Liquiça, kuandu loro-loron ami mai husi Gleno, ita-nia estudante barak mak hein karreta iha Tibar nia leten iha Riheu, Fahiten hodi ba eskola iha ensinu báziku Railaco,” Nia levanta liuhusi reuniaun plenária Parlamentu Nasionál (PN), segunda ne’e.
Estudante sira-ne’e hein karreta oras ba oras, dalaruma iha tuku 08h00 to’o 10h00, depende ba ema-ne’ebé laran di’ak atu tula, ho nune’e sira gasta de’it tempu hodi hein karreta.
“Nune’e, rekomenda ba diretór edukasaun Liquiça atu bele tau ensinu báziku paralelu ida iha Pala iha eskola ida foin halo iha ne’eba atu bele fasilita labarik sira asesu eskola besik,” nia hateten.
Husu koloka mós manorin hodi bele hanorin estudante sira iha ne’eba, nune’e estudante sira bele aproveita hodi aprende ho didi’ak bele garante sira-nia futuru ne’ebé mak di’ak.
Nune’e nia hein katak, reprezentante Governu iha reuniaun plenária rejista preokupasaun ne’e hodi bele komunika hela povu nia preokupasaun ba ministériu relevante.
Reprezentante Governu, Liuhusi Sekretáriu Estadu Komunikasaun Sosiál (SEKOMS), Expedito Dias Ximenes, lori Governu Konstitusionál da-sia agradese ba preokupasaun barak husi Deputadu sira hato’o hodi bele hetan atensaun husi Governu KOnstitusionál da-sia (IX).
Ba intervensaun deputadu sira-nia balun iha relasaun ho ministériu relevante liuliu kona-ba edukasaun sei hato’o ba ministériu kompetente, tanba ne’e dalabarak plenária PN iha segunda no tersa, sempre hato’o iha reuniaun Konsellu Ministru (KM) atu bele ministru relevante bele hetan preokupasaun husi Deputadu sira-nian.
“Ami nota hela, ha’u sei hato’o forma eskrita ba ministru kompetente no mós sei hato’o iha reuniaun Konsellu Ministru,” nia hateten.
Jornalista : Nelson de Sousa
Editór : Cancio Ximenes
