DILI, 09 dezembru 2024 (TATOLI)—Deputadu CNRT, Marcos Martins, husu Ministériu Obra Públika (MOP) atu normaliza urjente mota iha Gleno hodi prevene mota sobu komunidade nia uma.
“Rekomenda ba Obra Públika, iha Ermera mota ida iha Gleno A3, mota ne’e kada tinan sempre sobu komunidade nia um,m to’o agora seidauk tau atensaun ba fatin refere,’’ Nia levanta liuhusi reuniaun plenária Parlamentu Nasionál (PN), segunda ne’e.
Nune’e, nia dehan, lori komunidade nia lian hato’o ba Governu liuliu Ministériu Obra Públika (MOP) hodi bele halo intervensaun lalais ba mota ne’e.
Deputadu CNRT, José Virgilio, dehan iha nia kontaktu eleitorál semana kotuk iha Laleia-Manatuto liuliu iha besik ponte Laleia iha mota ne’ebé iha, bee-mota suli tun la tuir dalan ne’ebé komesa sobu natar kuaze ektare barak no iha irrigasaun ida ba iha Vemasse nian.
Nune’e, nia husu ba Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P, sigla portugés) atu halo normalizasaun ba mota ne’e, atu bee-mota ne’e bele suli tuir fali nia dalan loloos.
Aleinde ne’e, nia levanta mós kona-ba rezulatdu vizita eleitorál iha postu administrativu Ossú, munisípiu Viqueque, iha suku Waibobo, nia rona husi autoridade lokál sira katak suku ne’ebé izoladu tebes. Nune’e husu Governu atu iha Orsamentu Jerál Estadu (OJE) 2025 promulga ona atu Governu hakbesik aan ba suku sira-ne’e.
“Tanba, xefe suku ida mak ko’alia suku ne’e izoladu tanba de’it programa Governu nian la tama to’o iha ne’eba. Durante ne’e, só reprezentante Ministériu Administrasaun Estatál mak iha ne’eba, tanba xefe suku sira iha suku ne’eba,” nia dehan.
Nune’e, husu atu Governu tenke lori programa tama to’o suku sira liuliu iha área izoladu, tanba povu sira hein no sira preokupa kona-ba kondisaun estrada ladi’ak, la asesu liña eletrisidade no falta bee-moos.
Deputadu CNRT, Patrocínio dos Reis Fernandes, preokupa ho projetu kontrusaun ponte ki’ik ida iha Abatu-Same durasaun tinan ida resin ona seidauk finaliza entaun prezudika movimentu komunidade agora iha tempu udan.
Reprezentante Governu, Sekretáriu Estadu Komunikasaun Sosiál (SEKOMS), Expedito Dias Ximenes, lori Governu da-sia agradese ba preokupasaun barak husi Deputadu sira hato’o, hodi bele hetan atensaun husi Governu da-sia.
Ba intervensaun deputadu sira-nia balun iha relasaun ho ministériu relevante liuliu kona-ba estrada, sei hato’o ba ministériu kompentete, tanba ne’e dalabarak plenária PN iha segunda no tersa, sempre hato’o iha reuniaun Konsellu Ministru (KM) atu bele ministru kompetente relevante bele hetan preokupasaun husi Deputadu sira-nia.
“Kona-ba estrada, ponte ohin Deputadu sira hato’o iha Same no Ermera leten. Tantu, ida-ne’e ami nota hela, ha’u sei hato’o forma eskrita ba ministru kompetente no mós sei hato’o iha Konsellu Ministru sira bele hetan atensaun,’’nia hateten.
Jornalista : Nelson de Sousa
Editór : Cancio Ximenes
