DILI, 09 dezembru 2024 (TATOLI)—Deputadu KHUNTO, Antonio Verdiál de Sousa, husu Komisaun Antí-Korrupsaun (CAC, siglá portugés) atu nafatin firmeza iha serbisu ba kombate korrupsaun iha Timor-Leste.
“Bankada KHUNTO husu Governu liuhusi CAC atu nafatin iha firmeza no komitmentu ida-ne’ebé forte,’’ Nia hato’o liuhusi deklarasaun polítika iha reuniaun plenária Parlamentu Nasionál (PN), segunda ne’e, relasiona ho komemorasaun loron Mundiál ba Anti-Korrupsaun iha 09 dezembru ne’ebé ohin mundu tomak komemora.
Timor-Leste presiza hamoris kompromisu boot husi entidade hotu ho vontade sériu ho aten brani rejiste iha momentu saida de’it ba korrupsaun, ho nune’e hamutuk apoiu polítiku no mehi Estadu nian hodi lori povu ba moris di’ak.
Buka aumenta transparánsia forma ida-ne’ebé efikas hodi prevene korrupsaun, tenke garante prosesu hotu iha instituisaun públika ho transparante.
‘’Governu presiza loké espasu ka asesu ba informasaun espesialmente ne’ebé hateten respeitu ba jestaun orsamentál, konkursu públiku no mós desizaun estratéjika,’’ nia hateten.
Governu liuhusi CAC rasik buka meiu oinsá komunidade bele partisipa iha esforsu tomak ba prevensaun korrupsaun, no husu CAC atu ezekuta serbisu tuir lei númeru 7/2020, kona-ba Medida Prevensaun no Kombate Korrupsaun’’.
Deputada CNRT, Cedelízia Farria dos Santos, parabeniza ba komemorasaun loron mundiál antí-korrupsaun nian.
Nune’e, Nia husu nafatin ba CAC ne’ebé hala’o hikas sira-nia serbisu bainhira Governu Konstitusionál da-sia (IX) ka’er fila-fali ukun ba vakum tiha kuaze tinan ida resin iha Governu KOnstitusionál da-ualu (VIII) nia ukun.
“Ho nune’e, hanesan reprezentante povu ami husu CAC kontinua hala’o serbisu ho di’ak, la’ós atu ita halo serbisu kombate de’it maibé hanoin importante liu ita tenke halo prevensaun. Governu no nasaun ne’e labele sofre vítima ba hahalok ema sira-ne’ebé laiha responsabilidade,’ nia dehan.
Reprezentante Governu luhusi Sekretáriu Estadu Komunikasaun Sosiál (SEKOMS), Expedito Dias Ximenes, apresia ba deklarasaun polítika husi bankada KHUNTO ne’ebé fó parabéns ba loron mundiál luta kontra ba korrupsaun.
Jornalista : Nelson de Sousa
Editór : Cancio Ximenes
