LIQUIÇA, 09 dezembru 2024 (TATOLI) – Konsellu Imprensa (KI) Timor-Leste koopera ho UNDP iha Timor-Leste hodi realiza formasaun jornalizmu ambientál ba jornalista husi media oioin na’in-29 iha Munisipiu Liquiça. “Formasaun ne’e importante tebes ba jornalista timoroan hotu, oinsá bele hala’o atividade jornalizmu nian ho dignu, oinsá bele kontinua hala’o servisu ho profisionál ba informasaun sosiedade nian ba públiku hodi komprende ho diak, liuliu iha ambientál jornalizmu,” Prezidente KI, Otelio Ote liu iha diskursu bainhira loke formasaun ne’e iha Salaun Alma do Mar Liquiça, segunda ne’e.
Nia mós enkoraja jornalista sira atu tuir formasaun ho di’ak oinsá bele hasa’e liutan kapasidade iha mundu jornalizmu.
“Husu ba jornalista hotu-hotu atu aprende no kompreende diak ba oportunidade ne’ebé iha, tenke halao servisu nu’udar profisionalizmu, tenke buka hatene informasaun ne’ebé loos no kredivel, hodi afirma ba publiku ho informasaun transparente,” nia hateten.
Iha abertura ba formasaun ne’e Sekretáriu Estadu Komunikasaun Sosiál (SEKOMS) reprezenta husi nia Xefe Gabinete Elizeu Isaac.
” Sekretáriu Estadu nia lia-menon ba imi hotu katak, aproveita oportunidade ne’e ho di’ak atu hariku liutan imi nia konesimentu hanesan jornalista nune’e bele halo kobertura notisia sira ho di’ak,” Elizeu hato’o mendajen sekoms nian.
Jornalista na’in-29 ne’e kompostu hosi media sira iha Timor-Leste hanesan, Radiu Telivizaun Timor-Leste, Empreza Públiku (RTTL, EP) 15, Agência TATOLI ida no seluk mai husi media online no jornal sira.
Formasaun ne’e hahú durante loron neen maibé fahe ba etapa rua, etapa primeiru jornalista na’in-29 etaba segundu na’in-30. Etapa primeiru formasaun hahú 09-11 dezembru, enkuantu etapa segundu hahú 12-14 dezembru.
Durante formasaun, formadór mai husi Indonézia Untung Widyanto ne’ebé hanesan mós jornalista iha jornal Tempo Indonézia.
Atividade ne’e hala’o tanba hetan apoiu fundu husi UNDP atu kapasita jornalista sira iha Timor-Leste.
Iha ámbitu formasaun ne’e, iha sesaun abertura partisipa mós hosi reprezentante UNDP no Embaxadór Japaun iha Timor-Leste.
Jornalista: Hortencio Sanchez
Editór: Florencio Miranda Ximenes
