DILI, 05 dezembru 2024 (TATOLI) – Diretora Ezekutiva iha Hospitál Nasionál Guido Valadares (HNGV), Cecilia Barros, hateten konstrusaun pediatria andar lima no Unidade Kuidadu Intensivu Kardiolojia (ICCU) iha ospitál, daudaun ne’e, atinje ona pursentu 40.
“To’o agora konstrusaun ba pediatria andar lima no ICCU iha HNGV ne’e, to’o ona 40%, nune’e espera katak bainhira hotu bele responde ona espasu iha HNGV ne’e rasik”, Cecilia Barros informa ba jornalista sira iha nia kna’ar fatin HNGV, ohin.
Antes ne’e, Governu prevé ho montante orsamentu hamutuk milaun $9.3 no konstrusaun refere ho durasaun tinan rua, hahú 2023-2025 neʼebé kaer husi empreza China Civil Engineer Constrution Coperation (CCECC).
Lansamentu ba pediatria andar lima no ICCU iha HNGV ne’e iha inísiu fulan-Janeiru 2023 nian, depois konstrusaun ba pediatria andar lima ne’e, foin daudauk iha fulan setembru mak halo lansamentu ba ai-rin nian ne’ebé agora daudaun nia progresu atinje 40%.
Iha sorin seluk, Diretór Empreza China Civil Engineer Contruction Cooperation (CCECC), Liang Quing, komprometidu katak sei konklui projetu ida-ne’e ho infraestrutura ne’ebé kualidade ba Governu no povu Timor-Leste.
Jornalista : Felicidade Ximenes
Editór : Zezito Silva
