DILI, 09 dezembru 2024 (TATOLI) – Primeiru Ministru (PM), Kay Rala Xanana Gusmão, segunda ne’e hasoru malu ho Deputy Head of Mission of the UAE Embassy in Jakarta, hodi koa’lia kona-ba posibilidade harii estabelesimentu ospitalar iha Timor-Leste (TL).
“Sira hakarak oferese ospitál ida mai Timor-Leste, ohin, sira halo ospitál ida iha Solo iha fulan 10 de’it. Nune’e sira dehan ne’e sira mai hakarak oferese, ne’e duni mak ha’u bolu Señora to’o iha Lahane hodi haree. Sira haree fatin ne’e, maibé ha’u dehan lalika harii, maibé imi kompleta de’it ida harii ona ne’e. Ekipamentu sira mak ami presiza, imi mak sei tau. Liuliu ba ospitál nian la’ós hanesan ospitál sentrál. Iha HNGV ema moras mós ba, inus-been mós ba maibé ida-ne’e ba de’it problema sira tratamentu, hodi evita moras ne’ebé lori ba li’ur”, PM dehan ba Balide, segunda ne’e.
Notísia relevante:Ospitál Lahane Iha Ona Faze Reabilitasaun Hodi Prepara ba Fatin Moras Grave
Biban ne’e, Xefe Governu husu ba Deputy Head of Mission of the UAE Embassy in Jakarta, atu fasilita mós rekursu umanu.
“Ha’u mós husu ba Señora ne’e, atu hatete ba imi-nia Governu, ita mós presiza rekursu umanu, ne’e duni mai ona iha ne’e kuandu loke ona no ita-nia espesialista mós bele aprende”, PM dehan.
Deputy Head of Mission of the UAE Embassy in Jakarta, Shaima Alhabsi, sente kontente hodi hasoru malu ho líder ezekutivu TL, Kay Rala Xanana Gusmão hodi ko’alia kona-ba projetu konstrusaun balun.
“Ohin iha fatin ida-ne’e no ami agradese tebes simu ami ho di’ak husi governu. Horseik, ami hasoru malu ona ho Prezidente. No, ohin ami hasoru ona exelénsia Xanana no ami kontente tebes bele mai iha ne’e, ohin ho ekipa téknika hodi haree projetu ne’e”, nia dehan.
Alende ne’e nia dehan sei halo estudante sira-nia Koléjiu iha fatin Madre Guilhermina nian.
“Ba oin, ami iha kompromisu tomak no ami depende ba governu nian prontidaun atu halo ida-ne’e akontese hodi fasilita sira-nia prosesu. Entaun ami bele halo ida-ne’e akontese no ami entrega hanesan promete ona fasilidade ida ho klase mundiál ba estudante sira iha Koléjiu ida ne’e”, nia ramata.
Jornalista: Osória Marques
Editór: Rafael Ximenes de A. Belo
