ADTL promove formasaun kona-ba emprendedorizmu ba EhD iha Bobonaro-Covalima
DILI, 10 dezembru 2024 (TATOLI)–Asosiasaun Defisiénsia Timor-Leste (ADTL) promove formasaun kona-ba emporendedorizmu ba Ema ho Defisiénsia (EhD) sira hodi hakbiit organizasaun ka grupu rua ninia membru sira atu hala’o atividade negósiu.
Jestora Programa ADTL, Rosália Pereira, hateten ADTL servisu hamutuk ho Institutu of Business hodi fó Formasaun kona-ba oinsá ema ho defisiénsia kria ideia ba iha negósiu no Banku ANZ fó formasaun ba ema ho defisiénsia sira kona-ba jestaun finanseira.
Nia dehan, ADTL parseria mós ho Institutu Apoio Dezenvolvimentu Emprezariál fó formasaun kona-ba planu negósiu no jestaun finansa ba asosiasaun ema ho defisiensia iha munisipiu rua no organizasaun rua ne’e halo negósiu iha ortikultura, produsaun kulat no haki’ak ikan hodi faan fali.
“Objetivu ne’e atu kapasita iha área jestaun finanseiru atu ema ho defisiénsia labele dependente ba iha asaun karidade maibé tempu ona atu ko’alia kona-ba direitu umanu, ema hotu iha direitu atu asesu ba servisu iha área sosiál no ekonomia,” Jestora ne’e hato’o iha loron 16 kampaña ativizmu kontra violensia hasoru feto no labarik feto ne’ebé realiza dialogu públiku hosi FOKUPERS no World Vision ho tema “Promosaun feto liuhosi empoderamentu ekonomiku no direitu” iha Delta Nova, tersa ne’e.
ADTL iha papel ne’ebé kapasita feto ema ho defisiénsia iha empoderamento ekonomia, tanba ADTL iha kooperativa hahú iha 2017 ne’ebé envolve ema ho defisiénsia feto ho mane.
“Agora, tempu atu fó kapasitasaun, espasu no apoiu ba sira (ema ho defisiénsia) hodi bele dezenvolve sira-nia aan,” nia dehan.
Iha diálogu ne’e, nia dehan, serbisu atu hetan osan la’ós de’it serbisu iha kantór no tuur iha kna’ar fatin ne’ebé nakonu ho Air Conditioner (AC), maibé serbisu hotu-hotu ne’ebé iha rendimentu ekonomia hodi sustenta aan no família ne’e mós serbisu ida.
Tanba ne’e, nia husu ba foinsa’e sira no ema hotu atu bele hahú negósiu liuhusi atividade enprendedorizmu ekonomia.
Jornalista : Jesuína Xavier
Editór : Cancio Ximenes
