Fundasaun KHK realiza kompetisaun tein ba ai-han tradisionál iha Viqueque

VIQUEQUE, 10 dezembru 2024 (TATOLI)-Organizasaun lokál Fundasaun Knua Haberan Komunidade (KHK), tersa ne’e, realiza kompetisaun tein ba ai-han tradisionál ba Grupu sira iha munisípiu Viqueque.

Fundasaun KHK realiza kompetisaun ne’e tanba hetan apoia husi Gabinete Apoiu Sosiedade Sivil (GASS). Ho objetivu husi kompetesaun ida-ne’e, atu promove mane sira ba tein ai-han lokál sira tanba dala-barak feto sira mak servisu prepara hahan ba mane sira.

“Liuhusi kompetisaun ida-ne’e, ami hakarak mane sira maka prosesu tein ai-han. Dala barak ne’e ita-nia hanoin feto de’it maka bele tein, nune’e liuhusi kompetisaun ida-ne’e mane sira bele hatudu talentu tein nian ba sosiadade katak servisu feto nian mane sira mós hatene”, Diretór Fundasaun KHK, Agusto Pinto, hateten ba Tatoli, hafoin abertura kompetisaun tein ai-han tradisionál, Beobe, suku Uma Ki’ik, ohin.

Nia enkoraja, grupu sira-ne’ebé partisipa iha kompetisaun tein ai-han tradisonál atu prepara-an ho di’ak hodi hetan valór husi ekipa jurí nomós promove produtu lokál sira.

Grupu sira-ne’ebé partisipa kompitasaun mak hanesan Grupu Lemorai, Grupu Sentru Halibur Juventude Raitahu, Grupu Luruboru, Grupu TukubHalibur, Grupu Hakbit Família no Grupu Tatolin.

Prémiu ba manán na’in-sira kompostu husi primeiru lugar sei hetan osan $200, segundu lugár hetan $150 no terseiru lugár $100. Enkuantu ba grupu sira-ne’ebé la liu hetan fini modo-musan hodi ba kuda iha toos.

Iha fatin hanesan, Xefe Departamentu Asuntu ONG munisípiu Viqueque, Augostu Sousa, agradese ba Fundasaun KHC no GASS ne’ebé loke kompetisaun tein ai-han tradisionál ba mane sira hodi hatudu sira-nian koñesementu no abilidade.

“ha’u apresia no agradese ba Fundasaun KHK esforsu loke kompetisaun sira-ne’e ba ita-nia grupu sira”, nia agradese.

Jornalista : Vitorino Lopes da Costa
Editór :       Florencio Miranda Ximenes