DILI, 10 dezembru 2024 (TATOLI)–Movimentu Amante Futeból, José Luís Oliveira, hateten Governu laiha polítika di’ak ba dezenvolvimentu futeból iha Timor-Leste hodi promove kompetisaun liga nasionál, tanba rezultadu selesaun nasionál ba joga iha rai-li’ur enfrenta derota ho golu barak.
José Luís Oliveira hato’o lamentasaun ne’e relasiona ho ekipa selesaun nasionál ne’ebé derrota iha jogu ASEAN Mitsubishi Eletric Cup 2024 ne’ebé lakon ho Tailándia ho golu 10-0.
Nia hateten, dezenvolvimentu kompetisau liga desportiva iha Timor-Leste importante hodi promove no reforsa ekipa selesaun nasionál forte liutan.
“Daudaun ne’e ita ekipa selesaun nasionál lakon 10-0 ho Tailándia, dezenvolvimentu laiha, liga futeból mate, depois ministru ne’e sa’e ba asumi kargu. Liga futeból, liga volleyball no liga desportu sira seluk ne’e importante, tanba ne’e parte husi dezenvolvimentu desportu. Desportu dezenvolve liuhosi atividade liga, la’ós pasear ba rai-li’ur. Kampu futeból uza ba kosertu. Ministru ne’e laiha kapasidade. Primeiru, troka ema-ne’ebé laiha kapasidade, tau ema-ne’ebé vizaun di’ak ba desportu, oinsa desportu kontribui ba dezenvolvimentu nasionál no desportu kontribui mós formasaun umanu sidadaun Timor-Leste,” Nia hateten ba Agência TATOLI, iha sorumutu atu hodi hanoin hamutuk ba kondisaun reál realsiona ho asuntu “Agrikultura, saúde, bee-moos, edukasaun hodi buka dalan ba hatán dezafiu sira,” iha salaun UCT, Balide.
Nia lamenta, golu to’o 10 ne’e xoke Timor-Leste no ema-ne’ebé hadomi rai ida-ne’e sente xokadu tanba derrota ne’e ne’e kauza fallansu polítika tanba tinan ida-ne’e alias tinan kotuk la aloka osan ba futeból ne’e oinsá atu dezenvolve fuetból Timor-Leste.
Joven sira tenke hetan biban atu dezenvolve hodi selesiona terinadór ba jogadór sira bazeia ba iha kompetisaun, la’ós ba hili selesaun nasionál ne’e hili de’it ema hanesan hili sira-nia oan ni família sira sai ekipa selesaun nasionál la liuhusi kompeteisaun ruma.
Nia sujere ba Governu atu promove kompetisaun regulár hodi jogadór sira bele kapasita aan no dezenvolve talentu iha kampu iha mundu foteból.
“Kompetisaun regulár hanesan meiu importante desportu, ema sente nia talentu ne’e bele kadi halo di’ak liuhusi kompetisaun regulár, la’ós derepente hili de’it fó treinadór. Ó atu hili treinadór husi fulan mós kuandu liga laiha, ekipa nasionál la halo tanba la aprende joga iha kampu laran. Ó treinu bele forte maibé esperiénsia kampu laiha ne’e mós ladi’ak. Ha’u ko’alia, tanba ha’u mós antigu jogadór hatene no komprende lala’ok jogu nian,” nia sujere.
Nia lamenta, fallansu ne’e hahúu husi partidu polítiku, rekrutamentu polítiku no nomeasaun ba ema la tuir méritu, tanba ne’e mak ema ba tuur ne’e lahatene halo polítika ba asuntu desportu.
“Rekruta ema-ne’e, ema-nia kapasidade no komprende, la’ós ema-ne’ebé besik malu, familia, entaun la komprende interrese publiku no Estadu. Tenke hadi’a husi partidu. Sira-nia kuadru politiku sira tenke tuir méritu, la’ós tuir konfiansa de’it,” nia dehan.
Jornalista : Jesuína Xavier
Editór : Cancio Ximenes
