COVALIMA, 10 Dezembru 2024 (TATOLI) – Institutu Nasionál Administrasaun Públika (INAP) fó, durante loron lima, kursu informátika bázika ba funsionáriu sira iha Covalima.
Xefe Departamentu Formasaun Téknika, José Graciano, dehan INAP baibain fó formasaun IT, liuliu oinsá utliliza komputadór ba aplikasaun tolu mak hanesan microsoft word, excel no power point.
“INAP fó formasaun bazeia ba peskiza ba funsionáriu sira-nia serbisu, tanba hasoru difikuldade oinsá atu utiliza komputadór. Tanba ne’e, INAP hamosu inisiativa hodi fó formasaun”, José Granciano dehan iha Covalima, ohin.
Tuir dekretu-lei númeru 38/2012 fó kompeténsia ba INAP atu disponibiliza formasaun ba funsionáriu sira mak hanesan administrasaun eskritóriu, IT, nune’e bele eleva sira-nia koñesimentu.
Nia salienta katak, antes ne’e, INAP konsentra de’it formasaun iha nasionál, maibé daudaun ne’e lori formasaun hakbesik bá munisípiu no postu administrativu sira, ne’ebé atividade ne’e hala’o ona faze datoluk mak iha Ainaro-Fatuberliu fó kursu sobre komputadór eskritóriu, Lautém kona-ba baze dadus no Covalima formasaun IT.
Diretór Servisu Administrasaun no Rekursu Umanu, José Manuel Gonçalves, ne’ebé partisipa iha formasaun ne’e dehan bazeia ba proposta husi Servisu munisipál Administrasaun no Rekursu Umanu husu INAP fó formasaun iha área IT, nune’e bele tulun funsionáriu halo serbisu tuir idaidak nia knaar.
“Ami-nia planu fó formasaun ba kargu xefia no administradór postu administrativu sira, maibé tanba okupadu ho serbisu seluk, ami identifika fusionáriu husi servisu munisipál hamutuk 25”, dehan.
Jornalista: Celestina Teles
Editora: Maria Auxiliadora
