DILI, 10 dezembru 2024 (TATOLI)–Sekretariu Estadu Peska (SEP), Domingos dos Santos, hateten Ministériu Agrikultura, Pekuaria, Peska no Floresta servisu hamutuk World Fish hodi fornese ikan tilapia ba iha programa merenda eskolar iha munisipiu Ermera no Bononaro.
Governante ne’e esplika, ikan iha valór nutritivu aas no iha omega 3 no 6 ne’ebé ho funsaun atu hadi’a dezenvolvimentu serebru atu bele prepara jerasaun ne’ebé matenek ba dezenvolvimentu nasionál iha future, tanba ensinu báziku iha munispiu rua ne’e agora hetan ona fornesimentu ikan husi Governu no World Fish.
“Kada munisipiu eskola sanulu iha kada eskola hetan fornesementu ikan tilapia kilograma 289 iha kada semana ba alunu sira bele konsome. Ha’u hanoin, ba oin, servisu hamutuk ho World Fish atu aumenta tan ba iha eskola sira seluk,” Governante ne’e hateten iha sorumutu hodi hanoin hamutuk ba kondisaun reál realsiona ho asuntu “Agrikultura, saúde, bee-moos, edukasaun hodi buka dalan ba hatán dezafiu sira”, iha salaun UCT Balide, tersa ne’e.
Produsaun ikan no merenda eskolár hahu ho Governu anteriór, tanba ne’e mak sei kontinua hodi reforsa komunidade haki’ak ikan ba programa merenda eskolár, no ikan sira-ne’e foti husi grupu agrikultór sira iha munisipiu iha sentru viveiru World Vision no Governu nian ne’ebé sira sosa no haki’ak.
“Gradualmente apoiu konstrusaun tanke ka kolan ikan no ikan-oan (fini ikan) ba agrikultór sira iha munisipiu hotu. Governu servisu mós parseiru sira hodi introdús sistema haki’ak ikan bee nian mak hanesan ika tilapia ne’ebé fasil ba komunidade,” nia hateten.
Tuir nia, haki’ak ikan husi grupu no pesoál sira bele aumenta produsaun no konsumu ikan hodi hadi’ak populasaun nia nutrisaun.
Nia sujere ba entidade hotu atu hakotu no hamlaha no mánutrisaun iha Timor-Leste, komponente hotu-hotu hanesan Governu, setor privadu, komunidade, sosiedade sivil no parseiru dezenvolvimentu tenke servisu hamutuk.
Jornalista : Jesuína Xavier
Editór : Cancio Ximenes
