DILI, 10 dezembru 2024 (TATOLI) — Diretór jerál Sekretaria Estadu Formasaun Profisionál no Empregu (SEFOPE), Carlito do Rosário Cabral, fó sai rezultadu teste eskrita inglesh ba kandidatu sira ne’ebé númeru referénnsia sai atu ba servisu iha Austrália hamutuk 7.813
“Totál númeru referénnsia hamutuk 7.813, ida-ne’e mak iha ona sistema Work Ready Poll (WRP), karik empregador sira husu presiza dadus sira ne’e mak tinan oin ita sei fornese ba empregadór sira atu halo prosesu uluk hodi ba servisu iha Austrália”, Carlito do Rosário Cabral, informa bainhira halo konferénsia imprensa iha salaun SEFOPE, Caicoli, ohin.
Nia dehan, munisípiu sira ne’ebé mak hetan ona númeru referénnsia, fó sai iha ne’e hamutuk 7.813 husi ne’e RAEOA ne’ebé mak hetan ona númeru referénnsia husi sistema WRP hamutuk 99 kandidatu, Manufahi hamutuk 620 kandidatu, Manatuto 210 kandidatu, Liquiça 262 kandidatu, Lautem 657, Ermera 528, Dili 1.005, Covalima 658, Bobonaro 498, Baucau 1.096, Atauro 59, Ainaro 638, Aileu 822 no Viqueuqe 661.
“Númeru sira ne’e mak kada munisípiu hetan ona númeru referénnsia husi verry good, Good no exelente,” nia afirma.
Nia informa, SEFOPE liu husi Diresaun Nasionál Empregu Estranjeiru hakarak fó hatene ba kandidatu sira ne’ebé mak teste ona eskrita lian inglesh iha idaidak nia munisípiu atu ba hareee númeru referénnsia ne’ebé DNEE kria ona iha sistema Work ready poll (WRP).
“Ida-ne’e ita aplika ba kandidatu sira ne’ebé mak uluk tuir teste eskrita ho ninia klasifikasaun valór exelente, verry good no good, maibé ba sira ne’ebé mak valór seidauk to’o 50 ba leten mak sira nafatin tuir kursu lian inglesh, depois sira hotu simu sertifikadu bele ba update sira-nia valór iha kada munisípiu ne’ebé mak sira teste ba”, nia afirma.
Nia husu ba kandidatu sira ne’ebé mak hetan ona númeru referénsia atu hakat nafatin ba idaidak nia munisípiu hodi kompleta dokumentu liu liu pasaporte hodi entrega ba SEFOPE munisípiu ne’ebé mak ita boot sira ba teste, laos hothotu mai iha Dili.
“Sira ne’ebé mak durante halo reklamasaun ba Diresaun Nasionál Empregu Estranjeiru ita boot sira hein nafatin resposta liuhusi meiu ne’ebé DNEE iha atu responde ba ita boot sira-nia reklamasaun balun tuir teste, maibé naran la iha no balun teste iha munisípiu ida, maibé naran sai iha munisípiu seluk, entaun reklamasaun sira ne’e DNEE responde daudaun ona liu husi email, nune’e bele hatene ita boot sira-nia prosesu”, nia konklui.
Jornalista : Felicidade Ximenes
Editór : Zezito Silva
