DILI, 10 dezembru 2024 (TATOLI) – Koordenadór Komisaun Ezekutiva ZEEDOA, João Mendes Gonçalves hamutuk ho ekipa aprezenta uluk relatóriu Primeiru-Ministru (PM), Kay Rala Xanana Gusmão, atubele ajenda no aprezenta iha Konsellu Ministru tanba Komisaun Ezekutiva ZEEDOA simu mandatu husi Konsellu Ministru ho prazu tinan ida atu halo relatóriu ne’e.
“Ami iha mandatu tinan ida no servisu ne’ebé fó bá ami mós ramata ona. Ami entrega ona bá Primeiru-Ministru hodi tau bá ajenda nune’e aban halo aprezentasaun iha Reuniaun Konsellu Ministru,” João Gonçalves hateten, Palásiu Governu tersa ne’e.
Komisaun Ezekutiva Zona Ekonomia Espesiál Dezenvolvimentu Oé-cusse Ambeno (KE-ZEEDOA) finaliza ona relatóriu ne’ebé atribui kona-bá Estadu Rejiaun no Planu Estratéjiku Oé-cusse Ambeno ho Enkuadramentu Legál ho ninia projesaun orsamentu no sei halo aprezentasaun ba Konsellu Ministru iha kuarta ne’e.
Primeiru-Ministru apresia ho servisu ne’ebé ekipa halo ona, nune’e iha aprezentasaun Konsellu Ministru mak sei deside hodi aprova relatóriu sira hotu no enkuadramentu legál balun tenke haruka bá Parlamentu Nasionál.
Iha kuarta (24/01/2024) Konsellu Ministru aprova projetu Rezolusaun Governu nian ne’ebé aprezenta hosi Primeiru-Ministru (PM), Kay Rala Xanana Gusmão ho objetivu atu kria Komisaun Ezekutiva ida hodi haree bá estabelesimentu Zona Ekonómika Dezenvolvimentu Espesiál ida iha Oé-Cusse Ambeno.
Desizaun hodi kria komisaun ida-ne’e, atu konsidera katak, hafoin kuaze dékada ida dezde ninia kriasaun, projetu atu estabelese Zona Espesiál Ekonomia Sosiál Merkadu ida, hatudu inkapasidade atu kumpre objetivu sira ne’ebé propoin ona iha inísiu, hodi kria beibeik dúvida kona-bá ninia natureza, finalidade, kompeténsia no podér sira to’o ninia estinsaun.
Tuir rezolusaun ne’e katak, populasaun la haree-hetan Zona Espesiál ne’e hanesan realidade ida ne’ebé bele atende sira-nia nesesidade, laiha dinamizasaun ekonómika, atinje ekuidade sosiál no partisipasaun efetiva komunidade lokál nian.
Aleinde ne’e, jestaun Zona Espesiál dala barak konfunde ho administrasaun Rejiaun Administrativa Espesiál Oé-Cusse Ambeno nian, nune’e hamosu inserteza kona-bá ninia papél no impaktu efetivu.
Komisaun ne’e iha responsabilidade atu prepara no aprezenta bá Governu ho prazu fulan 12, estudu detalladu ida ho objetivu atu implementa Zona Ekonómika Espesiál ida iha Oe-cusse Ambeno, liu-liu ho deskrisaun pormenorizada kona-bá ninia objetivu sira, planu implementasaun no orsamentu nesesáriu ba efeitu ne’e.
Jornalista: Osória Marques
Editór: Rafael Ximenes de A. Belo
