COVALIMA, 11 Dezembru 2024 (TATOLI) – Alunu 272 husi Ensinu Pré-Eskolár 12 iha Covalima simu graduasaun ohin. Iha ámbitu serimónia ne’e, Reprezentante Diretór Servisu Munisipál Edukasaun Covalima, Juvito Correia Lino, husu inan-aman atu akompaña oan sira estuda iha uma no labele abandona sira.
Juvito Lino dehan pré-eskolár sai hanesan baze ba labarik sira fásil atu aprende molok tama iha eskola bázika iha primeiru siklu.
“Ohin, realiza serimónia graduasaun. Ha’u foti tema husi eskola sira seluk ne’ebé uza dehan aprende liuhusi Ensinu Pré-Eskolár hafásil ami-nia dalan ba futuru. Ida-ne’e sai xave ba estudante finalista pré-eskolár na’in-272 ne’ebé ohin simu graduasaun”, Juvito Lino dehan iha salaun Eskola Sekundária Jerál Públiku Suai.
Iha sorin seluk, Reprezentante Prezidente Autoridade Covalima, Filomeno Cardos, agradese ba manorin no ba inan-aman sira ne’ebé durante ne’e akompaña oan sira lori bá aprende iha pré-eskolár.
“Serimónia graduasaun ne’e realiza tanba esforsu mós husi manorin-na’in sir- nia tulun hodi prodús estudante finalista”, nia salienta.
Família husi estudante finalista Pré-Eskolár Naroman, Amonia de Jesus, dehan profesór sira ne’ebé hanorin alunu pré-eskolár ne’e ho pasiénsia, tanba labarik balun lakohi tama eskola, maibé sira uza maneira atu estudante sira bele eskola.
“Durante ne’e ha’u akompaña ha’u-nia oan iha eskola, ita haree manorin sira pasiénsia tanba labarik balun tanis iha saladeaula laran, manorin-na’in sira mak haree”, nia konta.
Estudante finalista husi Pré-Eskolár Naroman, Ángela Febiola Cardoso Barros, kontente tanba liuhusi serimónia graduasaun ne’e hakat tan pasu ida atu kontinua estudu iha ensinu báziku no saida mak aprende ne’e sei aplika iha estudu tuirmai.
Iha sorin seluk, Prezidente Komisaun Organizadora ba Serimónia Graduasaun, Samuel Moniz, adianta katak Covalima hala’o serimónia ne’e tanba kontribuisaun osan mai husi inan-aman no profesór sira ho totál hamutuk $1.615.
“Orsamentu ne’e ami aloka ba item sira hanesan dekorasaun $200, konsumu $1.300, lojístika $100, transporte $15 nune’e laiha saldo resin”, nia relata.
Estudante finalista ne’ebé simu graduasaun ne’e mai husi Pré-Eskolár Naroman, Bee Matan, Holbelis, Suku Loro, Audian, Busa Kukun, Dato Tolu, Sukabi Laran, Wedare, Beco no Lakonak.
Jornalista: Celestina Teles
Editora: Maria Auxiliadora
