DILI, 11 dezembru 2024 (TATOLI)–Autoridade Aduaneira (AA) ka Alfandega Timor-Leste kontribui reseita millaun $100-resin ba kofre Estadu, hahú husi fulan-janeiru to’o loron 11 dezembru 2024 ne’e.
Komisáriu Autoridade Aduaneira (AA), Joanico Pereira, hateten sira kolleta reseita liuhusi fobte sasán importadu ne’ebé tama iha fronteira sira hanesan Batugade, Salele, Aeroportu no Portu Tibar.
“Husi janeiru to’o mai horisehik ne’e, Autoridade Aduaneira rekolla reseita ka taxa ne’e hamutuk $100.779.482.66,” Joanico Pereira hateten ba jornalista sira hafoin lansamentu kódigu étika Asosiasaun despaixante aduaneira (ASDATIL), iha Timor Plaza, kuarta ne’e.
Nia esplika, reseita ne’ebé Alfandega rekolla iha tipu tolu mak hanesan montante direitu, postu seletivu konsumu no postu de vendas.
Autoridade Aduaneira mós prepara ona fasilidade hodi aplika taxa ba iha transporte sira-ne’ebé tula liu sasán todan tama husi fronteira.
Iha Batugade, nia dehan, iha jestaun integradu kostum fronteira sira-ne’e iha Ministériu Finansa nia okos no hamutuk ho Autoridade Aduaneira hodi tau matan ba fasilidade ekipamentu sira.
“Iha tinan rua ba kotuk, ministeriu finansa liuhusi jestaun postu integradu monta ona jembatan timbang iha Batugede, formasaun hotu ona no instalasaun. Maibé, hein hela lei tarifa ida husi Ministériu Transporte no Komunikasaun,” nia dehan.
Komisariu ne’e hateten, Ministériu Transporte no Komunikasaun ajenda ona ba iha Konsellu Ministru, bainhira aprova ona lei ne’e, jembatan timbang ne’e sei tama ba funsaun no karreta sira-ne’ebé tetu tula sasán todan sei selu kustu adisionál ba Estadu.
Jornalista : Jesuína Xavier
Editór : Cancio Ximenes
