DILI, 11 dezembru 2024 (TATOLI) — Ospitál Nasionál Guido Valadares (HNGV) sei sosa fasiliade médiku ba ospitál sira, liuhusi Orsamentu Jerál Estadu 2025 ne’ebe prevee HNGV hamutuk $ 14.855.92 ho objetivu atu hamenus transferénsia pasiente sira ba rai-li’ur, Diretora Administrasaun Finansa no Servisu Lojístika HNGV, Sara Maria Xavier, informa.
“Ita aloka hela fundus, iha tinan-2025, atu sosa ekipamentu médiku ba ospitál sira, atu nune’e ita bele hamenus transferénsia pasiente ba rai-li’ur, entaun ami sei sosa ekipamentu ba operasaun matan, ortopédia, moras fuan, ekipamentu sirúrjiku no mós ekipamentu médiku ba nehan no seluktan”, Diretora Sara Maria Xavier ba jornalista sira iha HNGV, Bidau, ohin.
Direta informa tan katak HNGV mós sei sosa fasilidade médiku ba moras kankru nian ho objetivu atu hamenus tranferénsia pasiente sira ba estranjeiru.
“Orsamentu aloka ona mai HNGV iha 2025 hamutuk $14,855.924 entaun ita hein prontu atu bele implementa iha tinan oin no totál fundu ne’ebé atu sosa ekipamentu médiku ne’e purvolta millaun $2”, nia akresenta.
Tuir Diretora ne’e katak departamentu idaidak iha HNGV hato’o ona nia planu atu sosa fasilidade médiku no orsamentu atu sosa ne’e aloka ona.
“Ekipamentu sira ne’e sei sosa liuhusi konkursu, labele sosa diretamente, maibé liuhusi prosesu aprovizionamentu ida no loke ba públiku,” nia esplika.
Antes ne’e, Espesialista Médiku Ortopédiku iha HNGV, Nilton do Carmo da Silva, mós lamenta kona-ba ekipamentu médiku hanesan Instrumentu Implante ne’ebé oras ne’e daudaun la adekuadu iha HNGV, no hahú husi janeiru to’o inísiu dezembru 2024, pasiente hamutuk 500-resin mak halo tratamentu ba fratura iha HNGV.
Jornalista : Felicidade Ximenes
Editór: Rafael Ximenes de A. Belo
