COVALIMA, 11 Dezembru 2024 (TATOLI) – Komisaun G Parlamentu Nasionál ne’ebé trata asuntu Edukasaun, Juventude, Kultura no Sidadania halo fiskaliza ba ezekusaun orsamentál ba Programa Merenda Eskolár (PME) 2024 iha Servisu Munisipál Edukasaun Covalima.
Vise-Prezidente Komisaun G, Gabriel Soares, dehan Parlamentu Nasionál hanesan reprezentante povu nia iha knaar atu aprova orsamentu no iha mós reponsabilidade atu halo fiskalizasaun kona-ba ezekusaun orsamentál.
Bazeia ba fiskalizasaun, implementasaun Programa Merenda Eskolár la’o ho di’ak iha Covalima.
Aleinde halo fiskalizasaun ba implementasaun planu asaun anuál edukasaun nian halo mós sensibilizasaun informasaun kona-ba dekretu-lei númeru 38/2008, 29 Outubru, kona-ba Lei Baze ba Edukasaun.
“Ami sosializa informasaun kona-ba Lei Reforma sira no Lei Baze ba Edukasaun, tanba ita hatene komisaun G sai hanesan matan, tilun no ibun, nune’e ami bele pasa informasaun”, nia salienta.
Komisaun mós rekomeda ba Edukasaun Covalima atu tau atensaun ba prosesu rekrutamentu ba manorin-na’in sira atu haree ba nivel estudu lisensiatura iha área edukasaun, tanba foin lalais prosesu rekrutamentu balun pasa, maibé nivel edukasaun la’ós lisensiatura edukasaun.
“Prosesu rekrutamentu foin lalais prosefór balun la’os lisensiatura edukasaun mós pasa iha teste, maibé ida ne’e iha indísiu uitoan. Prontu, ida ne’e mós ita konsidera no ita presiza kontinua halo rekrutamentu”, nia dehan.
Iha sorin seluk, Xefe Departamentu Jestaun ba Programa Merenda Eskolár Covalima, Gregório Ferreira Afonso, reforsa katak prezensa komisaun G Parlamentu Nasionál buka hatene ezekusaun verba ba merenda eskolár, konsesaun eskolár no sensibiliza dekretu-lei númeru 38/2008, 29 Outubru, kona-ba Lei Baze ba Edukasaun.
“Ha’u aprezenta ona ba komisuan G kona-ba ezekusaun orsamentál ba merenda eskolár. Ita hasoru difikuldade tanba Janeiru-Abríl estudante la han, nune’e osan balun ita presiza atu devolve ba kofre Estadu”, nia relata.
Dirijente Edukasaun ne’e klarifika katak, daudaun ne’e, seidauk bele fó sai relatóriu ezekusaun orsamentál ba merenda eskolár, tanba sei iha prosesu elaborasaun relatóriu ezekusaun orsamentál PME no Ekipa Jestaun Programa (EJP).
“Daudaun ita aselera hela dadus, nune’e seidauk bele aprezenta relatóriu ezekusaun PME, tanba EJP Fohorem ho EBF Radukama seidauk submete relatoriu ezekusaun, nune’e reponsavel merenda eskolar elobora relatóriu atu hatene osan hira mak ezekuta, hira mak fó fila ba kofre Estadu”, salienta.
Alokasaun orsamentu ba PME iha 2024 ba Covalima hamutuk millaun $1, ne’ebé kada estudante iha direitu han sentavu 0,42, hahú iha loron segunda to’o sesta ho totál loron efetivu 181, maibé kestaun orsamentu tarde maka fó han de’it alunu durante loron 139.
Jornalista: Celestina Teles
Editora: Maria Auxiliadora
